Logi Helgu

Annáll 2011

2011-12-31T23:59:00.000Z

Árið byrjaði á því að við komum okkur saman um nafn á Sindra og var þetta erfiðasta nafnasamningaviðræðan…og sú síðasta ;) Strákurinn átti bara fínasta fyrsta árið og hélt uppá það í kringjum jólin með einhverjum veikindum líka en ekkert alvarlegt.

Sunna 5 ára stóð sig eins og hetja í hálskirtlatöku og hélt áfram að dansa ballet og er búin að kenna sér sjálf að lesa (eins og margt annað sem hún kennir sér sjálf).

Bjartur "tannlaus" var í körfubolta og skipti svo yfir í karate sem virðist eiga betur við þennan 7 ára gutta. Hálf-gult belti í höfn en þó er hann segist aðalega vera í þessu til að fá fjólubláa beltið sem er uppáhlalds liturinn ;)

Dagný byrjaði í ballet. Hún hætti á ungadeild og fór yfir á Bangsadeild. Finnst ekkert leiðinlegt að vera með stóru systir, enda eru þær einstaklega góðar saman ;) Tókst svo að hætta með duddu í lok árs sem var ekkert auðvelt fyrir 3ja ára duddustelpu ;)

Ég og Bína urðum 9 ára og eins og oft áður kíktum við nokkrum sinnum á uppáhalds veitingastaðinn ;)
Annars reynum við nú bara að njóta lífsins með þessu yndislega fólki okkar =)

Bónerhópurinn skrapp í sushi í byrjun árs og síðan var góð óvissuferð sem gæti orðið erfitt að toppa.

Ég náði hálfu ári betur en 2ja ára veikindaleysi þegar ég nældi mér í pest sem tók mig nokkrar vikur að ná úr mér. Nú er bara að byrja aftur að safna í nýtt met ;) Síðan er alltaf tekið á því í bandý-inu þó svo það sé farið að fækka óþarflega í hópnum...

Póker hefur komið skemmtilega inn á árinu og ánægjulegt hvað þetta áhugamál hefur komið sér inn hjá mér og maður reynir að sinna því. Náði Bjólfsmeistaranum 2011, það gæti orðið erfitt að toppa það ;) Bónermenn hafa líka tekið upp regluleg spil og síðan tókst mér að ná spili með Monsa á sitt hvorum landshlutanum.

Í sumar fórum við á Seyðis og á heljarinnar ættarmót.
Náðum að skreppa í bústað einnig voru ströndin og húsdýragarðurinn nýtt

Í vinnunni hefur verið mikið að gera og margt gott verið gert fyrir utan vinnuna. Ég færði mig úr forritun yfir í ScrumMaster hlutverk og sinnti tveimur teymum en mun færa mig yfir í annað teymi eftir áramót. Það er nóg sem býður og margt sem þarf að gera og hefur Agile orðið stærri hluti af áhugasviðinu en ég átti upphaflega von á.

Pizzugerðin heldur áfram og myndi ég frekar kaupa Logapizzur heldur en margt annað sem hægt er að borga fyrir í dag ;)

Tónlistin var fyrirferðalítil á árinu en þó héldu Kónuglærnar uppá 15 ára starfsafmæli og ánægjulegt að við náum þó þessari einu spilahelgi á árinu og einnig ánægjulegt að þaka þátt í steggjun og brúðkaupi hjá Bjözza.

Jólin voru svo yfirfull af ánægjulegum fjölskyldugjörningum og Bína mín hugsaði vel um mig.

Enduðum árið í Sævangnum hjá Möllu&Þresti og co. þar sem árið var sprengt í tætlur. Þegar líða fór á nýja árið yfirgáfum við svæðið með hálf sofandi og uppgefinn barnaskara eftir æðislega samveru í upphafi nýs árs sem lofar bara góðu =)

Gullkorn krakkanna (2004-2011)

2011-12-24T15:55:00.000Z

Bína hefur verið mjög dugleg að safna saman gullkornum krakkanna á síðunni þeirra og þegar komst upp um daginn að Balli afi hafði ekki séð neitt af þessu skelltum við þeim saman í eina "bók" sem er hægt að sækja og glugga í yfir hátíðirnar ;)

Gleðilega hátíð

2011-12-23T23:22:00.000Z

Árlega jólakveðja á netinu er tilbúin, hafið það gott og takk fyrir það sem er að liðna.

Jólatréið skreytt

2011-12-22T23:15:00.000Z

Ekki fórum við að höggva okkar eigið tré í ár en björgunarsveit Hafnarfjarðar fær í staðin okkar stuðning með jólatrjáskaupum. Það fékk að hvíla sig í eina nótt á svölunum og síðan þvegið og komið fyrir. Í ár var sérstaklega valið lítið tré þar sem vitað er að litli tætilíus mun ekki láta það í friði og fannst skárra að hafa það uppá borði til að reyna aðeins að erfiða fyrir honum að komast að því ;)

Jólakortin tilbúin

2011-12-21T23:11:00.000Z

Búið að ná fram niðurstöðu í útliti á jólakortið í ár og prentun lokið...en það er ekki þar með sagt að þau verði skrifuð strax...hvað þá send...enda áttu þau í síðasta lagi að fara í póst í dag ;)

Sindri 1 árs

2011-12-19T23:08:00.000Z

Litli herramaðurinn orðinn eins árs. Þar sem svo stutt var til jóla héldum við veislu fyrir nánustu og var það afskaplega notalegt. Það er oft full troðið þegar vinum og fjölskyldu er boðið saman...en það er einhvern vegin auðveldara á sumrin ;)Sindri var bara sprækur og þótti ekki leiðinlegt þegar afi hans og langamma stjönuðu við hann. Síðan tók hann upp á því að ná sér í veikindi þegar leið á kvöldið og var í móki í nokkra daga...ekki alveg að hjálpa til með jólaundirbúninginn þau veikindi.

Jólaball 2011

2011-12-18T03:00:00.000Z

Stórball í Hörpu hjá vinnunni. Stelpurnar voru rosalega duglegar saman og voru 2 sjálfar á ferð út um allt í þvögunni. Þegar boðið var uppá gjafir fyrir utan salinn (í Hörpu) fóru þær fram og við á eftir...en fundum þær ekki. Endaði með að ég leit aftur í salinn og þar voru þær gráti næst við borðið okkar að reyna að skýra fyrir góðlátri konu hvað við hétum...þannig að þær voru týndar um stund...en höfðu hvor aðra ;)

Stekkjastaur

2011-12-10T14:08:00.000Z

Búinn að gera smá leit að Stekkjastaur og var farinn að sjá fram á að ná ekki að smakka hann í ár þar sem hann væri líklegast uppseldur.
Ég bauð Bjólfsmönnum í póker í tilefni 33 ára afmælisins og þeir komu færandi hendi...27 stekkjastaurar í tilefni þess að ég væri nú loks kominn í fullorðinna manna tölu. Þannig að ég fæ heldur betur að smakka hann í ár =)

33 ára

2011-12-09T16:13:00.002Z

Afmælisgjöfin frá Bínu er nú þegar komin vel á veg og sýnir bara hvað ég á yndilega unnustu, hún er algjört æði. Dagurinn byrjaði á því að krakkarnir sungu afmælissönginn og gáfu mér pakka til mín sem á stóð:

Til pabba besta ♥♥♥
Frá Gáfnastrumpi
Sætu sól
Skrípóstelpunni
og desemberinu

Síðan var ég knúsaður í bak og fyrir þar sem í fjölskyldudagatalinu stóð að knúsa pabba =)
Í vinnunni skelltum ég og Peter upp smá jólatónleikum í hádeginu...fannst upplagt að gera það fyrst það var afmælidagur =)
Þegar ég kom heim tók á móti mér ilmandi kökulykt og settist fjölskyldan að snæðingi.
Síðan skruppu þau öll til Bekku&Bödda og ég fór að undirbúa pókerkvöld sem ég hafði ákveðið að skella upp í tilefni þess að 33 væri nú ágætis pókerhönd ;)

Eplamerkt afmælisgjöf

2011-12-09T13:59:00.001Z

Opnaði afmælisgjöfina frá Helgu og þar tók á móti mér ~~eyrna~~epla-merktur peningur sem ég á að nota til að kaupa eitthvað sem mig langar í. Hafði sérstaklega gaman að merkingunni sem segir mér í hvers konar vöru ég á að eyða þessu =) Þannig að nú er sparnaðurinn hafinn...og eftir að velja vöru =)

Krílabörn 2011

2011-12-08T16:11:00.001Z

EInhverjar myndir náðust af þessum hóp um daginn...jafnvel ratar eitthvað inná jólakortin sem hafa ekki enn komist að hjá okkur.

Sunna balletmær

2011-12-07T15:59:00.003Z

Síðasta laugardag kláraði Sunna ballettinn fyrir áramót. Hún er alltaf jafn flott í balletkjól og gaman að horfa á hvað þessar stelpur eru duglegar. Verður spennandi að sjá hvort hún fer með dansinn langt.
Hefur verið í fótbolta aðeins en síðast ég vissi var hún hætt af því það væri ekkert gaman í "Frekjubolta", grunar að sá leikur fari eitthvað í góðmennskuna hennar ;)
Dagný hefur nú alltaf gaman að horfa á systur sína og vill alltaf hlaupa og taka þátt...sem er meira en hún vill gera í sínum tímum ;)

Töffari opnar mandarínu

2011-12-06T15:57:00.000Z

Svona er útbúnaðurinn þegar opna þarf mandarínu svo safinn fari ekki í augun =)

Piparkökuskreyting

2011-12-04T18:07:00.004Z

Piparkökurnar hafa verið skreyttar síðustu 2 daga...fátt betra en að drekkja þessum kökum í sykurleðju =)
Flestar eru kökurnar nú jólalegar eða litagleði en þemað hjá mér í ár varð meira "dauði og djöflar" ;)

Jóladagatal Loga 2011

2011-12-03T21:28:00.003Z

Eina og í fyrra passar Bína uppá að ég gleymi ekki hvenær jólin koma...ég held að ég eigi bestu unnustu í heimi ;)
Eins og Atli kom inná í fyrra þá er ekkert betra en jóladagatala sem geymist best kalt...en ég þori þó ekki að fylgja humynd Palla að geyma þá alla til 24 eins og Bjartur er að gera með súkkulaðidagatalið sitt...það gæti orðið til þess að ég fengi ekki aftur svona og ég ætla ekki að hætta á það =)

Jóladagatal Krílanna 2011

2011-12-01T21:12:00.005Z

Bína og krakkarnir dunduðu sér við í dag að búa til jóladagatalið á meðan ég var í vinnunni. Í ár er það snjókarl þar sem miðar daganna eru á maganum hans.
Bkgrunnurinn er 3 stór blöð sem Bjartur, Sunna og Dagný máluðu hvert sitt blaðið. Sunna sá um hattinn, Dagný tefilinn og Bjartur sópinn. Allir hjálpuðust að með dagatalið sem kemur afskaplega vel út =)
Á hverjum morgni er nú mikil spenna að kíkja & lesa hvað það er sem fjölskyldan gerir saman...mig grunar að "kítla pabba" og "borða í grímubúningum" komi aftur eins og í fyrra ;)

Myndataka 2011

2011-11-27T23:36:00.008Z

Á meðan að myndatökunni stóð horfðu leikföng krakkana hugfangin á
Í dag fórum við loksins aftur í myndatöku. Hún átti að fara fram í september en það tók tíma að finna rétta tímann til að hitta á ljósmyndara og hafa alla þokkalega til heilsu ;)
Allt gekk vel framan af en síðan fór Dagný að hætta að nenna þessu fljótlega...enda er engin leið að stjórna henni ef hún vill það ekki ;) En ég held að það hafi náðst fínar myndir af öllum krökkunum saman en er ekki jafn viss um að það hafi tekist að ná fjölskyldumynd í þetta skiptið þegar Miss D var komin í sitt besta =)
Klikkuðum á því að fara ekki fyrst að borða ís...prófum að gera það á næsta ári því það var svo mikill spenningur að komast í ísinn og þau voru svo kát eftir það ;)

Bjartur tannlaus

2011-11-22T23:06:00.006Z

Fyrsta tönnin dottin. Hann var frekar ánægður með sig að kippa henni úr sjálfur =) En það á ekkert að vera að setja hana undir koddann, hann er mun hrifnari af því að geyma hana og eiga...enda þykir honum óskaplega vænt um alla hluti ;)

Agilis 2011

2011-11-16T23:53:00.002Z

Fór á Agilis 2011 ráðstefnuna og hripaði niður mína upplifun. Þetta var fínasta ráðstefna. Missti reyndar af henni í fyrra en fannst þessi ekki jafn góð og 2009 þar sem Alistair Cockburn, Yves Hanoulle og Jeff Patton voru á sviðinu og fannst mér meira þungavikt í kynningunum þá. En þessi ráðstefna var fín og hafði Open Space fram yfir síðustu sem ég mætti á ;)

Bandýmót

2011-11-13T21:53:00.004Z

Bandý hefur átt ákveðin sess í mínu lífi síðan á unga aldri. Ég var aldrei sérstaklega mikill áhugamaður um íþróttir og þrátt fyrir að hafa prófað ýmsilegt var ég aldrei að finna mig. En í íþróttum í grunnskóla var bandýið alltaf mikil keppni og hart slegist...sem endaði yfrileitt með því að kennarinn gafst upp á að reyna að halda reglunum á lofti og þá var bara spurning hver myndi fara að gráta.
Síðan í menntaskóla hélt þetta áfram og var allaf heilmikið stuð og átök. Þegar komið var í háskóla tókum nokkrir Seyðfirðingar okkur saman og byrjuðum að spila á sunnudagsmorgnum, sem síðan færðist á laugardsagsmorgna og síðan bættust inn menn héðan og þaðan, aðrir duttu út...og í dag er þetta enn við lýði, en tíminn er seint á miðvikudagskvöldum...en alltaf jafn gaman.
Á háskólaárunum var ég líka í að halda uppi bandýtímum fyrir nördana og á sama tíma fór gott fólk að gera alvöru úr starfinu og koma íþróttinni á hærra plan hér á landi. Það starf gengur bara vel hjá þeim. Í dag var ég á bandýmóti í dag þar sem voru 2 lið skipuð ungum drengjum og þó þeir hafi ekki haft neitt í fílelfda karlmenn/kvenmenn þá sýndu þeir mjög góða taka og eiga einn daginn eftir að pakka okkur saman ;)
En bandýmótin hjá okkur í den voru ekki alveg jafn pro og í dag...þá voru það 3ja manna lið og rúsinan var að taka svo gufu og bjór eftir mót...ekkert svoleiðis í dag, nú eru menn bara með börnin á hliðarlínunni og að láta teipa sig á milli leikja...gamalmenni í ungmennaíþrótt...við erum alla vegana ungir í anda og verðum vonandi lengi með heilsu til að halda þessu áfram =)

Rafmagnsleysi

2011-10-30T23:30:00.001Z

Allir krakkar komnir uppí og þá ætluðum við að fá okkur pizzu. Um leið og ég setti pizzaofninn í samband varð allt svart...rafmagnslaust. Hélt ég hefði slegið út en sá svo að það var slökkt á öllu í nágrenninu, þannig að ég var varla orsökin.
Bjartur og Sunna voru enn vakandi og litla spekingnum fannst þetta frábært. Bað sérstaklega um að þetta yrði gert oftar, enda ekki á hverjum degi sem heimilið er upplýst af kertaljósi.
Reyndar man ég oft eftir rafmagnsleysi úr æsku...svona næstum jafn reglulegt og að sjónvarpið var ekki með útsendingar (á fimmtudagskvöldum...gömlu góðu dagarnir...he he ;)

Afmælisísar

2011-10-29T19:45:00.003Z

Bína bauð uppá Rice krispies ísa í afmæli hjá stelpunum um daginn og litu þeir einkar girnilega út =)

Grillaðir snúðar

2011-10-29T18:15:00.004Z

Í eitt af skiptunum í sumar sem við skelltum okkur í mu.is tók ég með snúða sem enduðu á grillinu. Það var svona líka merkilega gott og mæli eindregið með því...best að punkta þetta hérna svo það gleymist ekki ;)

Út að borða...

2011-10-25T23:43:00.007Z

...og það fer víst ekki á milli mála hvert við förum ;) Enda náum við alltaf í 2 fyrir 1 og þegar við drekkum hvorugt rauðvín þá er þetta mjög hagkvæmt...jafnvel ódýrar að fara 2 svona fínt út að borða heldur en að fara með alla fjölskylduna á einhvern skyndibita...enda er ekkert ódýrt í dag =)
En ég er alltaf jafn sáttur og nýt hvers bita.
Þetta er orðið svo vanafast hjá okkur að við kunnum meira að segja utan af hvað við pöntun, munum númerið án þess að skoða matseðilinn...það væri nú gaman að vita hversu oft við höfum farið og fengið okkur 10B =)

Krakkahópurinn

2011-10-23T23:27:00.006Z

Þarna eru þau öll saman...yndislegt fólk, alltaf nóg að gera að snúast í kringum þau en það er bara gaman ;)
Hlakka til að kynnast þeim betur og vera hluti af þeirra lífi...verður fróðlegt þegar að allir verða orðnir unglingar =)

Ljúflingur

2011-10-22T13:54:00.003Z

Það eru víst fáir sem skilja þetta en ein yndæl kona á Seyðisfirði kallar mig alltaf ljúfling og ég stóðst ekki mátið að kaupa þennan þegar ég rakst á hann í búðinni um daginn =)

Ætla að reyna að halda mig frá þessum þangað til á afmælinu, þá ætti hann að vera aðeins búinn að þroskast ;)

Sunna 5 ára

2011-10-21T00:04:00.002Z

Sunna yndislega átti afmæli í dag. Stóra stelpan er á lokaárinu í leikskólanum og eftir ár verður hún komin í skóla með stóra bróður. Hún er alltaf jafn góð og þær systur ná ákaflega vel saman. Í leikskólanum í dag fékk Dagný að fara með að baka köku og gera allt þannig að vart mátti sjá hvor átti afmæli. Hún hefur ákaflega gott hjarta og hugsar einstaklega vel um aðra þessi litla pappastelpa =)

Dagný 3 ára

2011-10-11T22:26:00.003Z

Verðandi kvikmyndastjarnan og skemmtikrafturinn "Miss D" átti 3 ára afmæli í dag. Það mætti nú halda að hún væri aðeins eldri miðað við hvernig hún lætur...og hvernig hún stjórnar ;) En hún gerir það mjög vel og verður gaman að sjá hvað verður úr þessum skemmtikrafti sem er alveg yndisleg.
Hún var nú ekki alveg til í að vera vakin í morgun við afmælissönginn og gróf sig bara undir koddann. Ólíkt henni en hún er búin að vera mjög þreytt undanfarna daga og þurfti smá tíma til að komast í gang. Um leið og minnst var á gjafir var hún sprottin á fætur og orðin sjálfri sér lík ;)
Síðan var afmælismatur í kvöld og hún ákvað að bjóða uppá grjónagraut sem er í uppáhaldi =)

Kóngulærnar 15 ára

2011-10-03T15:08:00.009Z

Kóngulærnar fögnuðu 15 ára starfsafmæli um helgina með því að spila á tveimur böllum á Eskifirði.
Flugum austur á föstudeginum og þar tók Nikki á móti okkur á nýja hljómsveitarlúxusbílnum sínum þannig að okkur leið eins og sannkölluðum rokkstjörnum um borð og ekki skemmdi fyrir að með bílnum fylgdi ógleymanlegt mix-tape sem skemmti okkur mikið.
Um kvöldið var það fjarðaball þar sem elstu bekkingar í grunnskólum á austurlandi söfnuðust saman. Ekki vorum við nú alveg með lagalistann sem að þau hlusta á en þau kunnu þó ýmislegt sem kom að óvart. Siggi tók svo kassagítarinn og spilaði nokkur tískulög fyrir þau á meðan við hinir tókum pásu og hlóum að því hversu gamlir við værum ;)
Laugardagskvöldið var svo aðeins eldra fólk sem mætti á ball og aðeins betri tenging milli okkar og þeirra þá. Það var alveg augljóst að þau þekkti lögin og voru á sama róli ;)
Helgin var reyndar full erfið fyrir mig þar sem mér tókst að ná mér í einhverja pest sem er búin að vera að herja á mig síðustu vikur og þurfti því að sofa mikið og bryðja verkjatöflur til að komast í gegnum þetta allt saman.
En alltaf gaman að hitta hinar kóngulærnar og ánægjulegt að spila á Eskifirði í tilefni 15 ára afmælisins og þökkum þeim 600+ sem mættu fyrir samveruna.
Ekki höfum við nú enn náð 100 framkomum skráðum en það styttist...ættu að verða komnar í hús áður en við hittum aftur á austurlandi eftir 5 ár til að halda upp næsta starfsafmæli ;)

Allt um pókermót á einu blaði

2011-09-29T21:12:00.007Z

Ég hef mjög gaman af því að hitta góða félaga og taka póker (Texas Holdem no limit) og fékk þá flugu í höfuðið um daginn að það væri gaman að vera með einblöðung sem myndi skýra leikinn.
Það þarf oft að rifja upp hendurnar, hvað spilapeningarnir gilda og ýmsar siðareglur sem menn vilja gleyma ;) Þannig að það er ýmsilegt sem kemur þarna fram og sérstaklega hugsað fyrir þá sem eru að læra leikinn en einnig gott að hafa við höndina þegar mót er haldið.
Þannig að ég tók mig til...tók reyndar smá tíma... að safna saman því sem ég vildi hafa þarna og setja það upp. Fékk góða hjálp frá Ella og blaðið má nú finna á alltumpóker.com þar sem við erum að byggja upp vef kringum póker.
Þetta ætti að nýtast mörgum og síðan er bara að sjá hvort þetta verði ekki uppfært og bætt með tímanum =)

Pizzuilmur

2011-09-11T16:05:00.004Z

Alltaf jafn gaman að skella í pizzu og merkileg hvað ilmurinn af pizzadeiginu er góð ;)
Síðan er stóra spurningin hvaða álegga fara á. Uppáhalds samsetningarar eru (í engri sérstakri röð):

Klassík - papperóní, paprika og laukur

Blómasprengjan - peppersóní, ananas, chillipipar og svartur pipar

Hómerinn - pepperoní, grænar ólífur, rjómaostur og svartur pipar

Klassík var í mörg ár uppáhaldið en síðustu ár hafa hinar tvær sótt svo í veðrið að ég get ekki gert uppá milli.
Er nú ekki mikið að prófa eitthvað nýtt, en væri gaman að fá tillögur í comment um nýtt ;)

Nýtt tímabil hefst hjá Bjólfi

2011-09-09T15:12:00.000Z

Nýtt tímabil hófst hjá Bjólfi með "árlegu" afmælismóti hjá Iðnaðarmanninum. Ánægjulegt að hitta menn aftur og gaman að byrja mótaröð eftir sumarfrí.
Mér gekk nú ekkert sérstaklega vel, kannski af því ég var hálf þreyttur eftir langan dag, en ég var hvorki nógu heitur né heppinn. Tók svo áhættu á að hitta á lit móti setti en lenti á móti 2 húsum og var dottin út áður en höndin var öll komin í borð. Síðan var tekið smá aukaspil á næsta borði hjá þeim sem voru dottnir út og spjallað langt fram eftir nóttu.

Óvissuferð Þróunar 2011

2011-09-09T15:02:00.004Z

Nóg af óvissuferðum þessa dagana ;) Nú var röðin komin að óvissuferð Þróunar Landsbankans 2011 (Þróun er deildin sem ég tilheyri þar sem tölvunördar og fleiri eru). Byrjað var að rútuferðalagi en þar sem ég var bílandi hafði ég meðferðis tvö afmælisbörn sem byrjuðu strax að skemmta sér á leiðinni og voru einstaklega hress og góðir ferðafélagar.
Rúturnar enduðu með skarann uppí Kjós þar sem farið var í ýmsa leiki á túninu fyrir neðan Ungmennafélagið Dreng. Síðan tók við létt bjórsmökkun (margir orðir bjórþurfi á þeim tímapunkti), bændaglíma og smá ferðalag í Matarbúrið þar sem við kynntumst ostagerð og lífrænni búfjarrækt.
Grill tók svo við í Dreng og eftir það stakk ég af því ég hafði lofað að vera mættur annað um kvöldið þannig að ég missti af restinu á kvöldinu sem hefur ábyggilega verið hress og vænti ég þess að afmælisbörnin hafi verið hressust allra ;)

Óvissuferð Bóners 2011

2011-09-03T14:12:00.001Z

Fyrsta óvissuferð Bóners varð loksins að veruleika. Það hefur verið rætt um þetta lengi og Linda&Siggi tóku að sér að skipuleggja ferðina í ár. Úr varð hin mesta skemmtun þar sem sungið var með rónum, dansað á Laugarveginum og gert undarlega mikið af því að knúsa ókunnuga. Fabrikkan & Skemmtigarðurinn fylgdu svo í kjölfarið og endað í veislu hjá skipuleggjendunum. Allt var þetta skipulagt í þaula og meira að segja bílar og ökumenn til reiðu og verður erfitt að toppa þetta að ári ;)
Þegar ég var búinn að vera að í tólf tíma gafst ég upp á djamminu og kom mér heim, enda vissi ég að í fyrramálið biðu mín nokkrir litlir einstaklingar sem þurfa víst að fá smá athygli af og til ;)

Óvissuferð Víðvalla 2011

2011-08-19T14:30:00.003Z

Skipt var upp í lið í ár og voru karlarnir (makar) einn hópur af sjóræningjum. Síðan kepptumst við móti kúrekum, glamúrgellum, íþróttastelpum og fleirum í að leysa þrautir í Hafnarfirðinum. Okkur gekk nú bara nokkuð vel og höfðum gaman að. Saklaus hraðbankanotandi varð nú dauðskellkaður þegar að hópur af sjóræningjum læddist aftan að honum og smeygði sveðju fyrir háls - og prestur sem beið eftir brúður fyrir utan krikju leist ekkert á þennan föngulega hóp sem fór að hanga þar með honum - en allt fór nú vel að lokum og engin ódæðisverk voru framin.
Presturinn hafði orð á því hvað við værum góðir að taka þetta svona alla leið og vera í búningum og með props og svaraði ég honum um hæl "þú líka" ;)
Síðan var tekið sund og endað í partý þ.s. bjórkjúklingur og lambalundir flæddu ofan í liðið. Gítarinn var svo tekinn fram og veislugestum og nágrönnum skemmt fram eftir - held þetta sé í annað sinn sem ég spili á gítar í partý-i, síðast var það fyrir 2 árum einmitt í óvissuferð með Víðivöllum =)

Veikur!

2011-08-16T16:54:00.004Z

Náði mér í einhverja pest og vaknaði drulluslappur á laugardagsmorgni. Var að vonast til að ná að hrista hana af mér um helgina, en nei. Lá bara aðallega og horfði á góða veðrið út um gluggan alla helgina og varð að melda mig veikan á mánudagsmorgni.
879 dagar síðan að ég hef þurft að skrá mig veikan í vinnu. Hef alveg verið slappur á þessum síðustu 2+ árum en alltaf náð að mæta til vinnu fyrr en núna.
Nú er bara að endurstilla teljarann, byrja aftur á byrjurnarreit í röðinni og markmiðið að slá fyrra met eða jafnvel að verða aldrei veikur framar ;)

Uppskerumót Bjólfs 2011

2011-08-12T14:28:00.012Z

Bjólfsmenn hittust í kvöld og tóku smá uppskeru á síðasta ár og upphitun fyrir komandi tímabil. Bolum var deilt út sem og aðrar gjafir sem ekki tókst að útdeila á lokamótinu og Bjófsmeistarinn 2011 fékk meistarahúfuna og bauð hann uppá verðlaunabjórinn sem er búinn að býða eftir þessum hitting síðan á lokamótinu.
Spilið byrjaði ekki alveg eins og ég vildi. Fékk lítið af höndum og fór síðan með megnið af staflanum í pott með hæðsta par (kóngar) í borði en lenti á móti tvemur pörum. Var þá frekar illa haldinn og fékk engar hendur og endaði á að þurfa að kaupa mig aftur inn rétt fyrir lokun innkaupa í hléi.
Eftir hlé og nokkra bið var ég með og fékk sett af tíum og Bóndinn var til í að veðja. Kóngur lét svo sjá sig í borð og náði ég að tvöfalda mig upp á kostnað Bóndanns með fullt hús á móti tíusettinu hans.
Þá var Lady Luck komin á öxlina og hendurnar fóru að láta sjá sig og allt rúllaði fínt. Þegar við vorum orðnir þrír eftir og bara spurning hver yrði bubble fékk ég og var með. 2 spaðar komu í borð og gosi og ég prófaði að veðja og var séður af Bótaranum. Kóngur á turn var gott spil fyrir mig, kominn með hæðsta par og grunaði hann um að vera að bíða eftir spaðanum. Veðjaði og fékk svörun. River kom með þriðja spaðann í borð og Bót fór allur inn. Ég var viss um að hann hefði hitt á litinn, þó svo að ég væri líka með hann þá var möguleiki á að hann væri með ásinn. Ég þurfi að taka mér góðan tíma í að sjá en vissi að ég ætti lítið eftir ef ég myndi tapa. Bót sýndi þannig að spaðakóngurinn minn hélt og kominn í verðlaunasæti og í góðri stöðu fyrir endaslaginn móti Massanum.

Með Lady Luck á öxlinni átti Massinn ekki möguleika. Ég hitti og hitti, fékk raðir í floppi og beið eftir að hann myndi hitta eitthvað en hann var bara ekki að fá neitt. Þegar hann var orðinn lítill fór hann allur inn og ég með sá hann þ.s. kóngarnir voru búnir að vera ráðandi á borðinu allt kvöldið. Ekki fékk ég kóng en 4 tíglar breyttu kónginum í lit og Bjólfsmeistarinn 2011 tók kvöldið en greifinn & gestgjafinn var vel kominn að öðru sætinu, alltaf ánægulegt að fá inn í höllinni hans.
Ánægulegt að taka eitt svona mót til að hita upp fyrir 2012 árið sem hefst á árlegu afmælismóti hjá Iðnaðarmanninum eftir tæpan mánuð.

Sumarfrí 2011

2011-08-07T22:55:00.004Z

Þá er enn eitt sumarfríið yfirstaðið og eins og síðustu tvö ár er margt líkt með þeim. Við byrjuðum á að fara á fjölskyldudag í Selvík daginn eftir að ég byrjaði í fríi og nokkrum sögum síðar lögðum við af stað í bílferð austur.
Lögum af stað í blíðu í Hafnarfirði en þeim mun lengra í burtu sem við komumst versnaði veðrið. Í Staðaskála var stoppað og þurfti að berjast í gegnum kulda og rok til að komast inn og var ég ekki alveg í stíl við veðrið í kvartbuxum og stuttermaskyrtu.
Gistum eina nótt og keyrðum svo áfram daginn eftir á Seyðisfjörð. Krakkarnir fengu lúxus afþreyingu á meðan ferðinni stóð, enda var ferðatölva og 2 leikjatölvur við höndina til að dunda sér þegar keyrslan var farin að verða leiðigjörn.

Á Seyðis komum við beint á ættarmót og svo eitthvað fleira gert áður en við heldum aftur suður.
Ætluðum að fara suður fyrir en um morguninn kíkti ég á netið og rak augun í að Múlakvísl væri farin þannig að við fórum aftur norðurleiðina. Stoppuðum á Akureyri og þegar tilkynnt var að allir ættu að fara úr bílnum og teygja úr sér heyrði í Dagný: "Ég ætla bara að bíða í bílnum". Tókum smá rölt og rákumst á Laufey og síðan Evu af Víðivöllum.
Keyrðum svo áfram í bæinn með stoppi í sundlauginni á Blöndósi en þrátt fyrir að vera þar í sól var kaldur vindur sem náði undarlega mikið að blása yfir laugina.

Síðan kíktum við nokkrum sinnum í Húsdýragarðinn og náðum góðu veðri fyrir eina strandferð og kíktum í bústað og á smá ættarmótshitting hjá Bínuætt einn sunnudagseftirmiðdag.
Einhverjar endurbætur voru á heimilinu og fór tími í að mála hillur fyrir Bjart og setja upp langþráðan eldhúsbekk. Lét bólstra bekkinn þannig að hann er sérstaklega þægilegur til að leggjast í og á eftir að nýtast vel þó svo að Bína hafði strax áhyggjur af því að ég myndi alveg hætta að gera nokkurn skapaðan hlut eftir matinn, nú myndi ég bara leggjast fyrir ;)

TIl að klára sumarfríið skelltum við tvö okkur á Hereford, svona eins og við gerum stundum ;)

Húsdýragarðurinn

2011-07-21T11:08:00.005Z

Í dag fórum í Húsdýragarðinn þ.s. árskortið okkar var að renna út. Það er alltaf gaman að rölta þar um. Bjartur er orðinn það stór að hann hleypur bara sjálfur út um allt. Við dólum okkur svo í kringum Naglfarið og kíkir í ýmis tæki með krökkunum. Tökum svo iðulega eitthvað með á grillið og í dag voru það bara snúðar sem bragðast merkilega vel heitir af grillinu og ekki verra ef þeir eru aðeins létt brenndir.
Við erum búin að vera þokkalega dugleg í garðinum undanfarið, þannig að jafnvel bíðum við aðeins með að endurnýja kortið...en það margborgar sig ef maður fer nokkrum sinnum og fer í tækin.

Myndin er af Bjarti að kveðja Sól eftir ferð í Húsdýragarðinn sem er mjög viðeigandi þ.s. þau eru að flytja aftur austur á Egilsstaði eftir verslunarmannahelgi.

Nauthólsvík

2011-07-20T12:23:00.003Z

Loksins var veðrið þokkalegt og við skelltum okkur í Nauthólsvíkina. Vorum reyndar í fjöru þannig að ekkert var nú sérstaklega gaman að taka sjósundið og ekki var hægt að fara út yfir grynninguna á gúmmíbátnum.
Dagur, Inga og Sól komu með okkur og Gauti kom líka við. Enduðum við í kaffi hjá Gauta en komum þangað svo seint að það endaði í kvöldmat. Gauti eldaði dýrindis grænmetisrétt sem var góður endir á góðum degi.

Karrakot 2011

2011-07-18T11:41:00.002Z

Á dagskrá var að fara á ættarmót(-shitting) á Laugarvatni og fórum við því að skoða hvort ekki væri hægt að gera eitthvað meira úr því og fá bústað. Þó svo að við fengum engan bústað í sumar gegnum starfsmannafélög þá vorum við svo lánsöm að Þröstur&Malla lánuðu okkur Karrakot, alltaf gott að eiga góða að.
Þar er alltaf gott að vera og gátum við kíkt á Slakka, Engi þar sem var mjög skemmtilegt Völundarhús, Geysi, gönguferðir og svo auðvitað pottinn. Myndir frá Karrakoti og ferðinni eru þarna inná milli.

Seyðisfjörður 2011

2011-07-12T11:33:00.000Z

Eftir ættarmót vorum við nokkra daga til viðbótar á Seyðisfirði. Alltaf gaman að hitta fólkið og sérstaklega gaman að fá Jóhann og co. frá BNA. Við fórum í skógarferð í Egilsstaðaskó og sund, kíktum á Dvegatein en mest var nú af því að hanga, spjalla, borða og drekka. Ekki var nú veðrið alveg hið besta þannig að ýmsilegt sem var planað datt uppfyrir og kannski minna um dagsferðir vegna veðurs. En sitthvað festist á flimu í myndaalbúminu.

Ættarmót 2011

2011-07-06T11:22:00.000Z

Keyrðum austur á Seyðisfjörð í byrjun sumarfrís á ættarmót. Um 250 manns voru á ættarmótinu sem stóð alla helgina og var hin mesta skemmtun. Auðvitað erum við alltaf mjög upptekin að sjá um krakkana og vorum því ekkert að taka of mikið á því, en það verður bara gert á næsta stórmóti ;)
Eitthvað náðist af myndum af ættingjunum og því sem gert var.

RFJ City Poker

2011-07-05T00:29:00.006Z

Monsi bauð mér í póker með vinnufélögunum. Fyrir 2 vikum vorum við á vesturströndinni og nú var það austurströndin. Fórum fyrst á EGS og sóttum tvo spilara og heldum svo á RFJ City.

Hægt var að kaupa sig endalaust inn fyrstu 2 tímana sem mér fannst full langur tími og aðeins of hættulegt fyrir menn sem ekki kunna sig. Einnig fannst mér vinningsupphæðirnar of hagstæðar fyrsta sæti sem fékk 70%, 2. sæti 20% og 3. 10%.

Fékk fínar hendur framan af spili en síðan gerðist lítið, en náði að hanga á fyrstu innkaupunum fram yfir innkaupatímann þó svo að ég var nánast búinn stuttu áður og hélt ég þyrfti að kaupa mig aftur inn. Komst á lokaborðið og þegar ég hitti á K í borði með K10 á hendi fór ég með allt mitt undir en lenti á móti KJ og datt út á háspilinu þ.s. gosinn tók 10-una hjá mér. Lítið við því að gera, enda var ég lægsti maður við lokaborðið.

Monsi náði að landa 3. sætinu, þannig að hann stóð sig mun betur en ég í þetta skiptið. Alltaf gaman að taka smá bílferð og póker =)

Ásinn fundinn

2011-06-25T23:59:00.014Z

Maggi Tóka bauð til double chance afmlæispóker á Ásnum í Keflavík. Monsi var nýkominn í bæinn og var til í að kíkja í meiri alvöru póker en við æskufélagarnir tökum stundum þegar við hittumst einu sinni á ári yfir bjór.
Þrátt fyrir veikindi í fjögra barna heimilinu tókst að redda pössun á meðan að Bína fór með Dagný uppá heilsugæslu að fá eitthvað við streptókokkasýkingunni.
Þannig að ég og Mons settum upp sólgleraugun og brunuðum suður fyrir.

Ég var spenntur að kíkja fyrir tvær sakir. Í fyrsta lagi að kíkja á Ásinn og taka spil með mönnum sem ég þekkti ekkert og í öðru lagi að prófa double chance sem ég hafði google-að að væri þannig að spilari fengi jafn háan viðbótarstakk(add-on) sem hann ætti inni og mætti bæta við hvenær sem er á tilteknu tímabili að kostnaðarlausu. Þegar ég mætti komst ég að því að double chance hér átti bara við eitt endurinnkaup (re-buy) þannig að ég fékk ekki að spila þá útgáfu sem ég hafði vonast eftir að prófa.
En Ásinn var notalegur og spilararnir virkuðu nánast allir mjög sjóaðir spilarar. Rétt skreið á lokaborðið en datt fljótlega út...
Nánar um spilið

Þrátt fyrir að við komum ekki með brauð heim í bú vorum við hæstánægðir með ferðina og alltaf gaman að taka smá road trip og póker er hin mesta skemmtun ;)

Fjölskyldudagur bankans

2011-06-25T22:46:00.000Z

Eins og í fyrra heppnaðist fjölskyldudagurinn mjög vel. Veðrið var mjög gott þó svo að rigningarský væru sjáanleg þá kom ekki nema smá úði undir lokin þegar flestir voru farnir að huga að heimferð.
Vonandi fer maður að skella sér í bústað þarna við tækifæri þ.s. ég fékk ekki úthlutun í sumar, sjáum hvort ekki gefist tími í haust/vetur til að kíkja í Selvík og jafnvel kemst maður að næsta sumar =)

Fjölskyldudagur Víðivalla 2011

2011-06-22T22:26:00.001Z

Foreldrafélagið stóð fyrir árlegum fjölskyldudegi hjá leikskólanum í dag. Í upphafi vikunnar var rigningarspá og einhver umræða uppi hvort ætti að fresta en spáin breyttist og hélt helur betur.
Hátíðin fór fram í sól og blíðu og var garðurinn yfirfullur af fólki sem át heldur betur af pylsum og var nóg að gera á bakvið grillið.
Brúðubíllinn var fenginn til að skemmta og var þétt setið í brekkunni á meðan sýningu stóð.
Vel heppnuð hátið að vanda og stóð foreldrafélagið og starfsmenn leikskólans sig með prýði og gaman að sjá svona marga saman komna.

Dagný kveður ungadeild

2011-06-22T22:23:00.002Z

Þá er Dagný hætt á ungadeild og komin á Bangsadeild með Sunnu. Hún fór um færandi gjafir til allra á Ungadeild í dag og var afskaplega sæt. Frekar spennt yfir að byrja á bangsa og hefur það verið lítið mál. Fór þangað fyrir nokkru að borða morgunmat með Sunnu og mömmu og var ekki sátt yfir að þurfa að fara á unga að matnum loknum, hún hélt að nú væri hún byrjuð á bangsa. Þannig að aðlögunin var meira að hún vildi ekki fara á unga og fór bara á bangsa ;)

Síli veidd í góða veðrinu

2011-06-19T21:28:00.004Z

Þreyta greip mig í gær og orsakaði að ég sofnaði mun fyrr en vanalega og var meira en hálfan sólahring sofandi. Þegar ég loksins komst á fætur tókst okkur að komast út á endanum að veiða síli í tjörninni á Víðistaðatúni. Ágætis blíða í dag og ekki seinna vænna en að nýta hana áður en byrjar að rigna á næstu dögum.

Krökkarnir stilltu sér upp í röð og náðist að smella mynd af þeim áður en þau ultu um koll ;)

Hlegið á 17. júní

2011-06-17T21:46:00.006Z

Við mættum snemma á Víðistaðatún í morgun en þá var ekkert opið eins og hefur oft verið. Þannig að við fórum bara aftur heim og fengum okkur að borða og drifum okkur svo eftir hádegismat.
Veðrið hélt í dag og eftir hoppukastala náðum við skrúðgöngunni koma inná túnið. Þá voru allir komnir með munninn fullan af nammisnuði og farið að horfa á skemmtiatriðin.
Björgin Franz var klárlega með besta atriðið og vakti mikla kátinu.

Síðan var farið í kaffi á Burknavellina og haldið heim um kvöldmatarleiti. Ánægjulegur dagur, þó að sólin hefði alveg mátt brjótast í gegn...ætli maður sleppi ekki að kíkja á skemmtunina niðrí bæ í ár...allir búnir á því ;)

Allt um póker

2011-06-16T00:05:00.003Z

Skál fyrir alltumpoker.com sem fór formlega í loftið 16. júní 2011. Læt light bjórinn duga núna í upphafi dags og fæ mér eitthvað "karlmannlegra" í kvöld til að halda uppá opnunina ;)

7 ára Star Wars aðdáandi

2011-06-05T23:48:00.006Z

Bjartur átti 7 ára afmæli í dag. Dagurinn byrjaði á smá ratleik þ.s. hann rauk út um allt hús frá einni vísbendingu til næstu þangað til hann fann smá gjöf frá okkur. Stóra gjöfin var að hann mátti fara sjálfur og velja sér eitthvað Star Wars dót í búð, en hann hefur nýlega kynnst þessum heim og við feðgar horfðum á fyrstu 3 myndirnar í páskafríinu og bíðum spenntir eftir að ná að setjast yfir næstu 3 ;) Einnig fékk hann gjöf frá systrum sínum og koss =)

En aftur að afmælisdeginum, þá voru róleheit fram til 12 því þá fórum við feðgar í búð að skoða dótið. Eftir að hafa skoðað allt stjörnustríðsdót komum við að samkomulagi að hann mætti taka 2 miðlungs legokassa í staðin fyrir einn stórann. Bjartur var afskaplega ánægður með að fá að fara sjálfur og velja gjöfina frá okkur, þó hann hafi reyndar viljað að DeathStar væri til.
Þegar heim var komið var þrifið og svo fylltist íbúðin af fólki. Þar sem sófinn er í fegrunaraðgerð var picknick stemmning í stofunni. Með afmæliskökum var boðið uppá pizzur og hvítlauksolíu.
Óðinn og Ingibjörg (bekkjafélagar Bjarts) komu svo í heimsókn eftir mat og fengu að vera svoldið frameftir að leika inni hjá honum. Bjartur var ekkert á því að fara að sofa og gerði það ekki fyrr en seint, enda hátt upp eftir góðan dag...nú er bara eitt ár í hamstur sem mamma hans lofaði honum þegar hann var 3 eða 4 ára ;)
Myndir frá bekkjarafmælinu & afmælisveislunni

Bekkjarafmæli Bjarts

2011-06-04T00:38:00.007Z

Bjartur hélt bekkjarafmæli í dag. Hér enduðu 12 krakkar í 2ja tíma veilsuhöldum. Heilmikið stuð að gúffa í sig mat og sætindum og ekki slæmt að eiga mömmu sem gerir flotta köku.

Gestgjafinn var svo með leik sem hann stjórnaði með prýði þó svo að hann hefði dregist aðeins á langinn. Ég var eitthvað að reyna að leika með smáfólkið og tókst að skipa þeim í lið með leik þ.s. hver og einn fékk mynd af dýri og síðan áttu allir að gefa frá sér hljóð dýrsins og finna sína hjörð(lið) sem var með sama hljóð. Það tókst vel en þegar var farið að láta liðin keppa endaði það með jafntefli til að halda öllum góðum ;)

Uppáhalds eftirrétturinn

2011-05-30T22:23:00.003Z

Það er ekki á hverjum degi sem súkkulaðið er hitað og ávötunum dýft ofaní...en það er alltaf jafn vinsællt =)

Bílaþvottur

2011-05-28T14:10:00.003Z

Það er víst löngu kominn tími á að ég þvoi bílinn og skemmtilegt tilviljun að Fanney (frænka) skyldi senda mér þessa mynd af mér að þvo bílinn minn þegar ég var um 4 ára aldurinn:

Það væri mjög fyndið að endurgera þessa mynd aftur...en líklega ekki jafn krúttlegt að sjá mig í dag á sprellanum að þvo bílinn ;)

Helgarferð á Seyðis

2011-05-20T22:16:00.014Z

Skrapp með eldri börnin 3 austur yfir helgina. Þau voru í góðu yfirlæti hjá Helgömmu á föstudagsmorguninn og eftir hádegi léku þau við Snorra frænda og fóru í fjöruferð og á leikvöllinn.
Það var þægilegt að vera ekki með ungabarn í för og geta skilið þau eftir góðan tíma á meðan ég sinnti öðru. Óli hafði fengið mig austur til að hjálpa til með Skálanes vefinn sem er allur að koma til.
Laugardagurinn byrjaði á frjálsum íþróttatíma í íþróttahúsinu og síðan var farið í sund eftir hádegi. Um kvöldið var svaka stuð á Eurovision á Múlaveginum og krakkarnir voru ótrúlega stillt vakandi fram eftir öllu og leika og taka þátt með gestum og heimafólki.
Ekki var nú laust við þreytu þegar heim var komið...enda langt síðan ég hef tekið djamm tvö kvöld í röð en svo skemmtilega vildi til að æskufélagarnir voru einmitt í fríi um helgina þannig að við tókum aðeins á því fram eftir nóttum ;)

Vel birgur bjórskápur

2011-05-11T20:59:00.003Z

Síðustu misseri hef ég nú dregið úr bjórinnkaupum. Það eru ekki mörg ár síðan ég fór ekki í vínbúðina nema að kaupa kassa af bjór og þá var það 4þ kall. Nú kostar svoleiðis víst aðeins meira þannig að á móti hefur bara verið dregið úr drykkjunni...þannig í stað þess að fá sér einn bjór á dag er það meira einn á viku ;)
En verslaði aðeins um daginn og kominn með smá safn í bjórskápinn:

Þarna vantar reyndar Stiegl sem var kominn í kælinn og ekki mikið keypt af...enda rándýr og Bragi var búinn að kaupa upp allt sem til var í landinu...það er barist um þessar flöskur ;)

Bjartur drukkinn =)

2011-04-24T19:19:00.002Z

Steggjun 2011

2011-04-08T10:52:00.003Z

Bjözzi var tekinn í smá steggjun í dag af sínum nánustu. Dagskráin var nokkuð einföld: taka upp ástarlag & myndband til Helgu. Hans nánustu tóku drykkjuna að sér og leystu Björninn þannig undan þeirri skyldu og tókst þeim heldur betur vel til ;) Góður dagur í góðra vina hóp og hérna má líta þá sem sáu um daginn:

Áhætt spil misjafnt gengr til

2011-04-06T21:26:00.006Z

Ég hef mjög gaman af Texas Holdem póker. Finnst leikurinn afskaplega margþættur og hægt að spila hann á margan hátt, t.d. út frá spilunum, út frá leikmönnum eða með flóknari leiðum ;)
Mjög skemmtilegt að vera hluti af pókerklúbb og frábært hversu gott starf formaðurinn hefur unnið.
Síðan byrjuðu Bónerkarlarnir á öðru pókerárinu í gærkvöld og notumst við að mestu við mótafyrirkomulagið hjá Bjólfi. Í fyrra var það Firday night poker en ákveðið var að hafa það Tuesday night poker þ.s. það hentaði betur að ná mönnum saman á þeim tíma. Fyrsta kvöldið gekk vel, þannig að nú er bara að sjá hvernig hin 5 ganga en úrslitin verða ekki ljós fyrr en undir lok árs.

Spilamennskan hjá mér er reyndar svoldið mikið inná heppnina ...en svo framarlega sem hún er mér hliðholl er það í lagi ;)

Veikindalaus í 2 ár

2011-03-30T00:00:00.004Z

Var að fatta að það er komið enn eitt árið í veikindaleysi og eru það nú orðin 2 ár síðan ég var síðast frá vinnu vegna veikinda...þannig að galdrakerlingin sem hjálpaði mér á réttu brautina vissi hvað hún var að raula ;)

Skeggjaðir bræður

2011-03-23T22:28:00.003Z

Hittumst og tókum mynd af skeggjunum áður en þau myndu öll fjúka.

Ég hefði þurft að vera búinn að hreinsa í kring um hýunginn og Gauti hefði þurft að halda sig á mottunni ;)

B&L 9 ára

2011-03-16T20:31:00.001Z

Við erum víst 9 ára um þessar mundir...einhverntíman var nú ákveðið að halda uppá þetta í heilan mánuð...en það er nóg annað sem við höfum að gera eins og er ;)

Bjartur körfuboltastrákur

2011-03-10T20:29:00.001Z

Bjartur gat loksins byrjað að æfa körfubolta í vetur. Það var ekki í boði fyrir 5 ára í fyrra en reyndar er einn fjölgreinatíma (karfa, fótb. og hand.) sem hann hefur engan áhuga á og mætir ekki í. Hef ekki hugmynd um af hverju hann er svona hrifinn af körfubolta þ.s. enginn sem við þekkjum spilar/æfir eða horfir á þessa annars ágætis íþrótt. En hann hefur áhuga og finnst ekki leiðinlegt að taka þátt í mótum og sérstaklega að fá verðlaunapening ;)
Starfið hjá byrjendaflokknum er til fyrirmyndar og alltaf gott þegar að fólk skilur að þetta snýst um fólk og að gera eitthvað meira heldur en að æfa. Guðbjörg & Dagbjört sem sjá um þetta eiga skilið gott hrós fyrir frábært starf.

Fyrstu helgina í mars var Nettómótið sem var fyrsta mótið sem mátti gista á. Þegar Bjartur hafði fengið staðfest að ég gæti komið með sem liðstjóri var hann til í að taka þátt, ekki alveg tilbúinn að gista einn (enda þekkir hann ekki krakkana það mikið enn). Þá hófst undirbúningur með fjáröflun þ.s. hann var ótrúlega duglegur. Hringdi út í ættingja og sá sjálfur um að lista hvað væri í boði og skrifa niður hvað hver ætlaði að kaupa. Honum fannst þetta mjög spennandi og fannst rosalega merkilegt að fólk skyldi vilja kaupa vörur af honum. Þegar vörurnar voru svo komnar keyrðum við feðgar þær út og fengu allir sem versluðu kaupauka frá Bjarti: bíómiði + popp á "Hvernig á að temja drekann sinn" heima hjá okkur. Hann hafði teiknað mynd sem af Náttofsa og prentuðum við út bíómiða sem Bjartur sá svo um að gata miðann þannig að flipi væri sem hægt væri að rífa af svo allt væri eins og alvöru. Nú bíður hann bara spenntur eftir bíógestum ;)

Nettómótið var í alla staði frábært. Það var ótrúlega gaman að taka þátt í þessu og kynnast krökkunum (og foreldrum) aðeins betur. Skipulagið á mótinu var til fyrirmyndar og skipulagið hjá G&D var enn meira til fyrirmyndar. Bíó, sund, hoppukastali, körfuboltaleikir, pizzuveisla, kvöldvaka, sofið á loftdýnu í þrengslum, verðlaunaafhending, hangs, bílferðir...bara gaman =) Nokkrar myndir frá mótinu, aðallega frá Haukum 9 sem var liðið okkar.

Sushi

2011-02-25T01:05:00.001Z

Fórum með Bónerhópnum á Fiskimarkaðinn um kvöldið. Ég var hæstánægður með að komast þ.s. ég átti von á að vera heima með slappa stelpu en er alltaf til að komast út að fá sushi.
Maturinn var æðislegur og þykir mér alveg merkilegt hvað mér þykir "vænt" um sushi...kannski bara vegna þess að ég fæ það sjaldan. Enn merkilegra er þó að ég skuli borða þennan mat þ.s. ég er enginn aðdáandi að hráum mat og þá sérstaklega ekki fisks. Auk þess er ég nú ekki mikið fyrir annað en steikta ýsu og vil helst ekki sjá lax. En ég læt mig hafa allt sem mér er boðið uppá á sushi bökkum og held að það sé nú aðallega vegna þess að ég kann vel við sojasósu og washabi ;)

Við drógum okkur svo fyrst af öllum til hlés, enda lítill herramaður heima fyrir sem þarf að fá móður sína mjög reglulega =)

Stóra pabbastelpan

2011-02-25T00:44:00.003Z

Sunna átti bókaðann tíma í morgun í hálskirtlatöku. Það er erfitt að þurfa að undirbúa barn fyrir svona...en jafnvel erfiðara að undirbúa foreldrana.
Hún var nú samt alveg með þetta á hreinu að læknirinn væri að fara að skera hálsinn og svo fengi hún ís.
Þannig að á föstudagsmorgni var hún orðin vel dópuð af verkjalyfjum þegar við fórum inn á móttökuherbergi þ.s. hún fór í föt í eigu þvottahúss spítalanna. Þrátt fyrir að hafa ekkert borðað síðan kvöldið áður var hún nokkuð hress...en ætli verkjalyfin hafi ekki átt þátt í því. Hún var undarlega "spræk" og hafði mjög gaman að gretta sig í spegilinn og skoða á sér tunguna...svona eins og þetta væri allt mjög merkilegt ;)
Henni stóð nú ekki alveg á sama þegar við vorum komin inná skurðstofuna og þar var uppsloppað fólk og allt mjög bjart. Hún passaði að vera þétt uppað mér en gaf ekkert upp um að hún væri óörugg og gerði allt eins og henni var sagt. Lagðist uppá borðið og fékk svo grímu á meðan hún hélt í hendurnar á mér þangað til hún sofnaði.

Við foreldrarnir & Sindri fengum svo að bíða frammi. Nokkru síðar máttum við koma inn og sátum yfir henni sofnaði í góða stund. Við vorum viðbúin hinu versta þegar hún myndi vakna. Á öðru rúmi var einn ekki sáttur við uppvakninguna og fylgdist maður því vel með Sunnu til að vera tilbúin þegar hún kæmi til meðvitundar. Góður tími leið og svo loks fór að bera á hreyfingu. Tók munnstykkið út úr henni og á móti kom eitt stórt bros. Við vorum hálf gáttuð hvað hún var góð en bjuggumst s.s. alveg við að það myndi breytast, ef ekki strax þá bara þegar verkjalyfin hættu að virka. Hún settist síðan upp og sagðist vera ringluð. Fékk ís og mátti velja að horfa á DVD eða lesa bók og valdi hið síðara þannig að ég fékk að lesa nokkrar bækur fyrir hana. Síðan mátti hún bara fara og læknirinn sagði að hún mætti borða það sem hún vildi.
Það var ekki að sjá að hún hefði verið í aðgerð þegar heim var komið. Vildi bara borða og leika. Fékk aðallega ís til að byrja með, en var strax komin í brauð og síðan fylgi kex og popp á eftir þó svo að foreldrarnir voru ekki par hrifnir af þessu fyrir hálsinn.
Allt hefur gengið vel en verður henni nú samt haldið heima nokkra daga fram í næstu viku og reynt að hafa hana í ró til að tryggja að allt fari vel...svona eins mikil ró og er á heimilinu ;)

Í tilefni þriðjudags...

2011-02-14T00:33:00.000Z

...fórum við út að borða á Hereford (kemur að óvart ;). Það var nú ekki með ráðum gert að gera það á valentínusardaginn, en ekkert verra =) Það vildi svo vel til að gömul bekkjasystir sendi mér 2 fyrir 1 á Hereford sem hún hafði fengið á nuid.is, takk Jóhanna. Það hefur komið oftar fyrir að við höfum nýtt svona góðar gjafir velunnara og var maturinn, eins og oft áður, afskaplega góður ;)

Sindri Logason

2011-01-16T17:05:00.004Z

Skírðum (í síðasta skiptið) í dag. Til hamingju með nafnið Sindri =)

Annáll 2010

2010-12-31T21:32:00.006Z

Bjartur stóri bróðir útskrifaðist af leikskólanum og byrjaði í skóla og kann því bara vel. Þar byrjaði hann að læra að lesa og gengur mjög vel.
Hann er alltaf jafn mikill spekingur og skipulagði páskaleit þar sem ég þurfti að fylgja vísbendingum.

Sunna hætti með duddu, varð 4 ára og hélt áfram að æfa ballet og vera jafn sæt og áður. Hún var nú ekki alveg sátt við að missa bróður sinn af leikskólanum en komst í gegnum það á nokkrum dögum, enda með litlu systir á næstu deild og fær hana yfir á sína deild á næsta ári.

Dagný varð 2 ára en segist/þykist nú alltaf vera mun eldri ;) Hún er alltaf jafn mikill grallari og sést það á henni langar leiðir, sem lífgar tilveruna bara enn meira =)

Þetta er yndislegur hópur af einstaklingum sem mynda þessa fjölskyldu og hef ég alltaf gaman að vera einn með alla krakkana.

Við Bína mín erum nú búin að vera trúlofuð í 3 ár og kíkjum reglulega á sama veitingastaðinn ;)
Nú hlýtur að fara að koma að giftingu hjá okkur sem hefur tafist vegna barneigna síðustu ár. Held að það sé ágætist árangur eftir 7 að vera komin með 4 börn =)
Einnig tókst okkur að kíkja nokkrum sinnum í leikhús og vonandi finnum við tíma á nýju ári til að ná nokkrum fleiri sýningum.

Annars er búið að vera nóg annað að gera, t.d. fann ég mig á Internetinu ;)

Ég skipti um vinnu. Tókst markmið að vera veikindalsus í heilt ár.
Er kominn í pókerklúbb með góðum mönnum og byrja spilamennskuna þokkalega.
Í tónlistinni var heilmikið spila í miðborginni með Kóngulónum og loksins sá ég Magna syngja Pearl Jam með tribute bandi.

Sumarfríið byrjaði á að kíkja í bústað í Grímsnesinu en þegar í ljós kom að fasteignaviðskipti voru að ganga upp hjá okkur varð ekkert af því að fara austur. Var tíma varið í að undirbúa flutninga og einnig þurfti að nota allt laust fjármagn í þau viðskipti. En það var líka nóg að gera í góðu veðri á bænum og ekki verra að hafa fengið trampólín að láni.

Síðan hefur verið nóg að gera um jólin, undirbúningurinn gekk ótrúlega vel og var Bína alveg að koma öllum í jólaandann. Loksins fór ég að höggva jólatré.

Síðan eignuðumst við strák stuttu fyrir jól sem jafnaði kynjahlutfallið í fjölskyldunni.
Vegna komu hans tókst ekki að klára alveg allt fyrir jólin...þannig hafa ekki nema helmingur jólakorta verið skrifuð vonandi sýna aðrir okkur skilning og vonandi klárum við þau og komum í póst á nýju ári ;)

Helgamma í heimsókn á árinu og var líka hjá okkur yfir jólin og áramót sem var yndislegt og höfðu allir gaman af og gott að hafa auka herbergi til að bjóða henni.

Nú erum við BL feðgar búnir að sprengja, krakkarnir eru nokkuð spenntir að bíða eftir áramótunum og skaupið fer að byrja. Fyrstu jól & áramót á nýjum stað með nýjum meðlim og gott ár að baki...

Logapizzur

2010-12-30T23:09:00.003Z

Ég er mikill áhugamaður um pizzugerð og þrátt fyrir að eiga ekki afkastamikinn ofn býð stundum heim í pizzu. Hef ég stundað þessa iðju frá unga aldri (þegar ég fékk að skreyta pizzurnar sem smápolli) en lengstum hefur þetta bara verið gert einhvern vegin og engin fastmótuð uppskrift notuð. Undir lok síðasta árs ákvað ég svo að punkta niður uppskriftina og fastmóta hana. Hún átti nú að vera opinberuð í byrjun árs en ég fór í smá mælingar og prófanir sem enduðu á því að ég gerði nokkrar einfaldanir á henni og þróaði yfir árið (alltaf gott að hafa ástæðu til að elda pizzur í tíma og ótíma ;). Bjór og flóknari hveitiblöndur hafa verið teknar út, en þó í raun sé nóg að nota ger, vatn og hveiti þá fékk ekki allt að fjúka í þessari útgáfu sem ég vil hafa til staðar í botninum.
Þannig að í tilefni síðasta dags ársins ætla ég að skella fyrstu útgáfunni í loftið. Set hana fram þannig að öll innihaldsefni eru í grömmum þ.s. það auðveldar mér til muna mælingar með eldhúsvog. Auk þess er mjög auðvelt að stilla fjölda deiga (pizza) sem á að búa til en það miðast allt við að eldað sé í rauðum pizzaborðofni. Aðferðin er nokkuð vel útskýrð en það er ýmislegt sem er skilið eftir óljóst enda er það breytilegt í hvert skipti, s.s. lengd og hiti við hefingu, tími við hnoðun...
Þ.s. nafnagiftir eru með ofarlega í huga þessa dagana ætla ég að nefna þessa útgáfu löglegu karlmannsnafninu "Gamli Gamli" þ.s. þetta er fyrsta (og verður því einhverntíman elsta) uppskriftin ;)
Hér er pizzauppskriftin mín og mun hún ávallt vera aðgengileg á http://p.logihelgu.com/ en þegar nýrri uppskriftir líta dagsins ljós munu þær birtast þarna en hægt að fletta upp gömlum...en það er eitt af mjög mörgu sem hugsanlega kemur þarna inn =)

Gamli Gamli - Pizzabotn Loga

Gleðilega hátíð

2010-12-23T23:49:00.002Z

...smelltu hér til að skoða jólakveðjuna 2010.

Barn er oss fætt

2010-12-19T16:51:00.004Z

Velkominn í heiminn...

Skruppum uppá fæðingardeild í gær og stuttu síðar mætti drengurinn, 14 merkur og 52 cm. Allt þetta þetta fljótt og vel og hafa það allir mjög gott. Gistum nóttina á Hreiðrinu og fórum svo heim morguninn eftir.

Hérna eru nokkrar myndir af kappanum. Velkominn í heiminn "stóri" strákur (en hann er stærsta barnið okkar...og þau verða ekki fleiri ;)

Jólakortin tilbúin

2010-12-18T18:38:00.002Z

Þá er búið að hanna/prenta jólakortin. Í fyrra tókst mér að fá í gegn mjög gott tilboð á prentuninni. En það var nú bara vegna misskilnings hjá þeim sem prentaði þau fyrir mig, en kostaði mig samt sem áður þras og tvær ferðir þ.s. fyrri prentunin klikkaði hjá þeim. Ákvað því að gera þetta sjálfur í ár. Hef verið með prentara í "geymslu" í nokkur ár og þegar ég ætlaði að kaupa ný blekhylki í hann sá ég að það var ódýrara að kaupa nýjan prentara. Sló til að gera það þ.s. sá prentari gat prentað á allt blaðið án þess að skilja eftir hvítan ramma. Prentarinn var ódýrari en blekið, og þó svo að ekki sé nema 50% fylling á bleki sem fylgir nýjum prenturum dugði það til að prenta jólakortin í ár, enda voru þau hönnuð til að vera "blekvæn" m.v. það sem maður gerir oft á þessum tíma ;)

Nú er bara að gefa sér kvöldstund í að skrifa þau...líklegast verður nú ekki mikið um rauðvín yfir þessum skrifum í ár þ.s. það gæti þurft að skjótast fyrirvaralaust á fæðingardeildina ;)

Jólatréið fellt

2010-12-11T10:12:00.000Z

Fórum í jólatrésleiðangur með Degi og co. (+ Rakel) uppí Katlagil. Þar var nú reyndar meiri órækt heldur en skógrækt en eftir göngutúr upp hlíðina fann Dagur fínasta blágreni sem hann fékk dygga hjálp við frá smáfólkinu að fella. Við enduðum svo á að finna (að því við teljum vera) rauðgreni í fínni stærð sem ætti að verða ágætis jólatré þegar búið verður að fylla það af skrauti. Það eina sem vantaði var að hafa snjó...en það var reyndar ágætt að hafa ekki meiri kulda ;)

_{Bjartur með hanagal, Sunna hermir og Dagný hristir hausinn =)}

Jóladagatal Krílanna 2010

2010-12-04T21:59:00.004Z

Ekki nóg með að Bína hafi fundið tíma (og orku) til að gera dagatal handa mér þá stóð hún líka fyrir fjölskyldudagatali.

Hún er algjört yndi. Á hverjum morgni les Bjartur hvað á að gera og þegar allir eru komnir heim er sameinast í að gera það. Afskaplega skemmtileg að hafa svona sem tryggir að allir geri eitthvað saman =)

Bestu jól ever?

2010-11-25T23:41:00.011Z

Bína gaf mér jóladagatal...24 pakkar...einn á dag:

...og hún mældi með að geyma þetta á köldum stað ;) Ég hef aldrei verið jafn spenntur fyrir jólunum...þetta verða klárlega bestu jólin ever ;)

Lucky Luke

2010-11-05T19:37:00.001Z

Úrslitakvöldið í 2. mótinu hjá Bjólfi var kvöld... Mótið fór ekki vel af stað hjá mér en á fyrsta kvöldi var ég 3ji maður út og var ekki vel settur þ.s. það voru bara 3 kvöld. Annað kvöldið gekk mun betur og með sigri náði að komast uppí annað sætið, en þó 4 stigum á eftir Iðnaðarmanninum. Í kvöld byrjaði kvöldið á því að ég tvöfaldaði mig fljótlega á kostnað Elvis, sem var einstaklega óheppinn og endaði með að hann kvaddi þennan heim. Eftir það var ég nokkuð vel settur og þegar Massinn fékk A10 fulla húsið var ég heldur betur vel settur með AQ fulla húsið og náði að byggja vel í haginn fyrir lokin. 99 gerði sig tvisvar, í fyrra skiptið hærra par en floppspil og græddi vel á því en í seinna skiptið voru níurnar ekki sigurstranglegar móti drollunum hans Eika. En vitir menn, nía í turn gerði út um Eika og var þá staðan orðin mjög vænlega fyrir endaleikinn. Ég og Massinn áttum smá rimmu undir lokin sem ég hafði svo fyrir rest og tryggði mér þannig efsta sætið í mótinu. Ekki slæmt að ná að stela efsta sætinu , en á fyrsta mótinu stalst ég í fyrsta sætið með að jafna Bósa að stigum þó svo að ég mætti bara á 3 af 4 kvöldum í því móti.

Lomminn á mikið lof skilið fyrir frábært utanumhald. Þetta er komið aðeins lengra en 5 spila pókerkvöld sem reglulega voru tekin yfir bjór fyrir aldamótin og á hann heiðurinn af þessum félagsskap.

SSSól 4 ára

2010-10-21T23:34:00.000Z

Sunna Sæta Sól varð loksins 4 ára í dag. Hún er búin að bíða allt árið eftir þessum degi. Hún er alltaf jafn yndisleg þessi litla elska eins og hún hefur alltaf verið frá því hún kom. Hún var vakin með gjöfum og fékk svo að baka köku í leikskólanum og ráða svoldið. Um kvöldið fékk hún að ráða hvað væri í matinn...ömmu&afa var boðið í súrmjólk með cherios (sem er uppáhaldið þessa dagana). Ekki fengu/þurftu nú allir að borða afmælismatinn hennar ;)
Yndislegt að eiga svona góða stelpu og hafa hana hjá sér...

Miss D tveggja

2010-10-11T20:47:00.005Z

Finnst svo stutt síðan Dagný mætti að það er merkilegt að hún er orðin 2ja ára og verðandi stóra systir. Í tilefni afmælisins var hún vakin með gjöfum: teikniborð frá krökkunum og púðastól frá foreldrunum. Hún var hin kátasta með allt, enda ekki við öðru að búast frá henni; hún er alltaf svo hress og kát. Þó hún sé lítilli 2ja ára heldur hún að hún sé 4 ára verðandi 6 ára. Það hefur sína kosti að alast upp með stórum systkinum og hluti af uppeldi hennar hefur verið frá Sunnu. Alveg magnað hvað þær eru góðar vinkonur og sú yngri apar allt eftir hinni. Þannig að það mætti segja að hamingjan skíni af henni alla daga...í það minnsta er alltaf mikið líf í kringum hana og hún alltaf til í að lífga uppá partýið =)

Hræðilegur matur, hræðilegur pabbi

2010-10-10T07:44:00.003Z

Byrjum daginn á því að fara í sund og vorum snemma á ferðinni, afskaplega gott hvað við vorum snemma komin út úr húsi og langt síðan við höfum farið í sund. Það bara varð að nýta veðrið í eitthvað annað en að taka til ;)
Síðan var ákveðið að fara í afmælisgjafaleiðangur og eftir búðaráp voru allir orðnir svangir þannig að við fórum á ónefndan hamborgarastað (sem við skulum kalla M). Förum að jafnaði bara einu sinni á ári þangað og ég ætla að reyna að lofa mér því að fara aldrei aftur þangað, maturinn smakkaðist ágætilega til að byrja með en þegar máltíðinni var lokið var þetta bara hræðilegt. Sem betur fer vildu krakkarnir bara ís, þau höfðu meira vit á matnum en við ;)
Fórum svo í leikfangabúð þ.s. ég fann einhverja skrímslagrímu og setti upp. Gekk svo í áttina að Dagný sem átti sér einskis ills von. Hún leit á mig og svona 2 sekúndum seinna umbreyttist andlit hennar í skelfingarsvip og ótta. Hún var ekki ánægð með pabba sinn að vera að hrekkja sig svona. Óskaplega erfitt að eiga svona hræðilegan pabba og hún vildi ekki ræða þetta. En þrátt fyrir hræðilegan mat og hræðilegan pabba tókst okkur að kaupa afmælisgjafir fyrir öll afmæli í október. Það voru víst 7 gjafir sem við komum heim með, og létta buddu ;)

Gott er að hafa mikinn mat, og marga helgidaga

2010-10-06T22:22:00.002Z

Við héldum uppá 3 ára trúlofunarafmælið í kvöld með því að fara út að borða á....jú, jú Hereford eins og hefur gerst stöku sinnum í gegnum árin. Eins og oft áður fékk Bína að keyra heim þ.s. ég hafði nóg með mig eftir matinn eins og svo oft áður ;)

Ungababbi

2010-10-03T20:52:00.006Z

Afskapleg góð helgi er nú að renna sitt skeið. Bína fór með vinkonunum í bústað og var ég því einn heima með krakkana. Föstudagurinn var í rólegheitum heima, allir elduðu pizzur og síðan var kósýkvöld með tilheyrandi sjónvarpsglápi og meðlæti =)
Á laugardeginum byrjaði dagskráin snemma. Ballet sýning hjá Sunnu og voru allir rosalega duglegir. Bjartur hjálpaði til við myndatökuna og Dagný sat framan af stillt og horði á Sunnu fylgja öllum fyrirmælum Guðbjargar balletkennara með sóma. Þegar tíminn var hálfnaður gafst Dagný uppá að sitja kyrr og fór og tók þátt í dansinum. Verður að segjast að hún stóð sig merkilega vel og fylgdi systur sinni í einu og öllu.
Að sýningu lokinni var farið heim og við gæddum okkur á snúðum úr bakarínu. Dagný tók smá kríju og allir voru klæddir fyrir afmælisveislu og stóru krakkarnir máluðu sitt hvort afmæliskortið. Nokkrum tímum seinna vorum við mætt í 2 ára afmæli Bryjnars Arnars þar sem kökur og leikur voru í aðalatriði og gat ég spjallað svoldið við fólk þ.s. krakkarnir voru afskaplega dugleg að dunda sér. Síðan héldum við heim á leið og Böddi&Bekka komu og pössuðu svo ég gat skotist á árshátið um kvöldið.
Náði heim fyrir lok dags og höfðu þau verið góð að vanda. Þurftu nú samt að rífa sig snemma á fætur eins og alltaf er gert um helgar (en aldrei á virkum dögum) þannig að aðeins bar á þreytu hjá 3ja barna föðurnum í dag ;)

Ég

2010-10-01T21:31:00.000Z

Helgama

2010-09-01T00:16:00.003Z

Helgamma var hjá okkur í nokkra daga og var það afskaplega notalegt. Krakkarnir voru hæstánægðir með hafa hana til að leika við og notalegt fyrir Bjart að komast snemma heim úr skólanum með hana heima. Hún og Bragi voru í Svíþjóð og við heimkomu fór Bragi norður að veiða og Helga greip tækifærið og stoppaði nokkra daga, enda ekki annað hægt þegar það er herbergi sem heitir Helgömmuherbergi ;)
Þegar þau komu að utan sýndi hún mér flugmiðann sinn þar sem stóð á "Helgama" og tók mig smá stund að fatta að þetta var auðvitað nafið hennar: Helga Martina. Ég hafði aldrei hugsað út í þetta hvað Helgamma nafnið væri nálægt nafninu hennar...skemmtilegt að uppgötva þetta svona =)

Í kvöld keyrðum við hana svo á flugvöllinn og kvöddum hana. Henni var veifað alveg frá því hún fór út í vél og þangað til að vélin fór af stað og reglulega kallað "Bless Helgamma". Sumir áttu svoldið bágt með að kveðja og horfa á eftir henni...en við verðum bara að ná henni aftur í heimsókn sem fyrst ;)

Bjartur skólastrákur

2010-08-30T23:49:00.003Z

Fyrir viku hóf Bjartur skólagöngu sína. Fyrsti dagurinn var nú bara skólasetning og annar dagurinn fundur með kennara. Þann daginn kom hann svo með mér í vinnuna og lék sér fram eftir degi og tókst svo að draga mig út í góða veðrið. Fengum okkur ís og skoðuðum Landnámssýninguna 871 sem var mjög áhugaverð. Vorum hátt í 2 tíma þarf og fengum afbragðs góða þjónustu og var ég hálf undrandi hvað safnvörðurinn sinnti okkur vel. Bjartur hafði afskaplega gaman að þessu og byrjaði strax að rukka um að koma með systur sínar og fleiri =)
En skólinn byrjaði svo á miðvikudaginn og hefur gengið mjög vel. Bjartur kann vel við sig og hefur verið svo heppinn að Svala frænka hans kemur oft á morgnanna og fylgir honum í skólann. Ekki slæmt að eiga stóra og góða frænku ;)
Merkilegt hvað hann stækkar fljótt og mér finnst nú ekki vera langt síðan ég sá hann fyrst.

Pearl Jam tribute

2010-08-20T23:48:00.008Z

Mig hefur dreymt lengi um að sjá Magna spila tónleika til heiðurs Pearl Jam. Í byrjun sumars missti ég af þeim tónleikum en þeir voru endurteknir í kvöld. Leit nú reyndar ekki út fyrir að ég kæmist en það reddaðist allt að lokum og þökk sé fleirum áhugasömum drattaðist ég niður i miðbæ Reykjavíkur uppúr miðnætti.
Missti bara af 2 lögum og tónleikarnir voru alveg magnaðir. Þó ég muni nú líklega seint lenda á tónleikum sem slá út Megadeth þá voru þetta með þeim betri sem ég hef séð/heyrt enda ekki leiðinlegt að heyra góð lög í góðum flutningi. Reyndar hafði ég nú alltaf ætlað að spila með Magna á svona tónleikum, en að var nú bara betra að fá að sitja út í sal og njóta =)

Nördahittingur

2010-08-14T23:26:00.003Z

Það er amk árlega sem við hittumst nokkrir "gamlir" Vefsýnarnördar og yfirleitt er það til að svala nördanum innra með okkur. Bjór og tölvuleikur er yfirleitt það sem ræður kvöldinu ásamt fuðurlegu spjalli. root er nýfluttur aftur til landsins eftir að hafa stundað akademíuna erlendis og var upplagt að taka hitting í tilefni komu hans. Svo mikill var nú kjaftagangurinn á okkur að ekkert varð úr nördaleikjum en enduðum í pókerspili langt fram á nótt. Smu tók fyrsta pottinn en ég hrökk í gang eftir það og þrátt fyrir höfðinglegar móttökur og gestristni tókst Fuji ekki að hafa sigur. Alltaf gott að hitta góða nörda og eiga með þeim góða kvöldstund...he he.

Afréttarinn 2010

2010-08-06T23:22:00.002Z

Linda & Siggi buðu í Afréttarann 2010 helgina eftir verslunarmannahelgi. Ekki var þó verið að halda uppá fyrri helgi, meira verið að fagna að þau væru bæði komin á fertugsaldurinn. Alltaf gaman að hitta hópinn, en eins og oft náðu ekki allir að mæta. Það var samt fullt af fólki, þekkti nú fæsta nema vinkonuhópinn og maka, en það var flæðandi af áfengi og hljómsveit, þannig að það var allt eins og best var á kosið. Eftir nokkra bjóra var ég orðinn vel "afréttaður" þótt ég hafi nú ekki verið á því sjálfur og var þá haldið heim. Einhver sönnunargögn má finna sem talin voru birtingarhæf ;)

Bjólfur poker club logo

2010-08-04T23:01:00.005Z

Pókerklúbbinn vantaði logo og ég var beðinn um að kokka eitthvað saman. Datt strax í hug að hafa stafina ofan á útlinum Bjólfs og hripaði niður hugmyndina.

Komst í að gera þetta einhverju seinna, skellti upp nokkrum tillögum og efir nokka klukkutíma og skjót/skýr svör frá Lommanum þá var niðurstaðan ljós:
Þannig að virðulegi klúbburinn er kominn með logo fyrir veturinn og gaman að sjá hvernig rissuhugmyndin varð að veruleika...maður gerir of lítið af því að skjalfesta allt sem maður tekur sér fyrir hendur.

Sumarfrí 2010

2010-08-03T22:24:00.012Z

Í ár átti að taka lífinu með ró í bænum og fyrir austan. Fasteignamálin fengu einnig smá orku sem skilaði sér í því að við fluttum en varð einnig til þess að við komumst ekki austur. Þótti það nú verra þ.s. allir voru mjög spenntir að kíkja til Helgömmu en það verður bara að bíða að sinni og nú getur hún bara komið og gist =)

Föstudagurinn 2. júlí
Bjartur kvaddi leikskólann og síðan byrjaði fríið á bústað í Brekkuskógi. Böddi og Bekka voru komin í frí þannig að þau gátu komið með. Þau voru á undan okkur uppí bústað og gátu varað okkur við að það væri kolagrill þannig að við gátum stoppað í búð og keypt kol.

Laugardagurinn 3. júlí
Þessi dagur var sannkallaður pottadagur hjá Dagný. Henni tókst að fara 3 ferðar yfir daginn í heita pottinn og alltaf fann hún fólk til að fara með sér út enda þykir henni ekki leiðinlegt í pottinum frekar en öðrum :) Fórum í búðarferð í Selfoss og skelltum nauti á grillið um kvöldið.

Sunndagurinn 4. júlí
Fórum í kaffi í Karrakot hjá Möllu og Þresti. Síðar um daginn komu Valgeir & Þyri. Einnig bættust við Nonni & Berglind & co. Bjartur var hæstánægður að fá strákana í heimsókn í bústaðinn og voru þeir Emil Gauti alveg týndir í leikjum.

Mánudagurinn 5. júlí
Gestirnir heldu heim á leið og við héldum bara að mest leiti til í bústaðnum. Kíktum í heitu pottarnir uppí þjónustumiðstöð og þar var bara gaman, hefðum þurft að fatta að fara þangað á meðan fleiri voru í bústaðnum. Eftir pottana í blíðviðri var farið að tröllaleira og boðið uppá Sóða Jóa (Sloppy Joes) í kvöldmat.

Þrijudagurinn 6. júlí
Vaknaði snemma með Sunnu og sótti Dagný sem var búin að vera að biðla til móður sinnar að taka sig uppúr barnarúminu í smá tíma. Dagný vaknar iðulega snemma og Sunna rífur sig upp um leið og hún heyrir í henni. Ekki alveg jafn mikil morgunkúarar og Bjartur.
Smá búðarferð inná Laugavatn. Stoppuðum á leikvelli en flúðum fljótlega vegna mýfluguárása.

Miðvikudagurinn 7. júlí
Fórum í smá ferð inná Slakka þar sem krakkarnir fengu að halda á kanínum, kettlingum, músum ásamt því að skoða fleiri dýr og svæðið. Smá stopp í Geysi í hinu mesta roki og vorum við í mesta basli með að komast upp "brekkuna". Auðveldara var þó að fara niður þótt að sumir fuku bara beint á andlitið.

Fimmtudagurinn 8. júlí
Ákváðum að taka heimferðina degi fyrr þ.s. við nenntum ekki að þrífa á föstudagsmorgni. Keyrðum framhjá Þingvöllum en þ.s. krakkarnir voru allir sofandi stoppuðum við ekkert þar í þetta sinn.

Föstudagurinn 9. júlí
Fyrir hádegi var ég á einhverju fasteignastússi þ.s. frjósemisíbúðin hefur nú loksins verið seld og við á leiðinni í stærra. Glampandi sól og ákveðið að gera eitthvað. Valið stóð á milli Fjölskyldu- og Húsdýragarðsins eða Nauthólsvíkur. Ég var fylgjandi þess síðara og fékk mínu fram við mis góðar undirtektir hjá yngra fólkinu. Allir voru þó sáttir á ströndinni í dag. Létu nú pabba um að kíkja í sjóinn, enda er hann full kaldur fyrir óeinangraða krakka. Ég tók 2 stuttar ferðir til að kæla mig niður og alltaf hressandi, svona fyrir utan saltbragðið. En unga fólkið, og sérstaklega Dagný, voru hæstánægð með að sulla í heitapottinum allan daginn. Allir vel útiteknir um eftir góðan dag á ströndinni og héldum til Bödda&Bekku í grill um kvöldið þ.s. eldri krakkarnir fengu að gista þ.s. við þykjumst ætla að taka smá til hendinni á morgun og ná góðri Sorpuferð.
Náði cash game með Bjólfi um kvöldið og var alveg fram á nótt. Náði að þrefalda það sem ég kom með og var reyndar nálægt því að klára allan þann pening sem ég tók með mér...passa alveg uppá að vera ekkert að spila fyrir meira en mér finnst of mikið (sem er mjög lítið ;)

Laugardagurinn 10. júlí
Tiltekt fram eftir degi. Náðum að taka búr og þvottahúsið í gegn, sem og barnaherbergið og ýmislegt. Smá sorpuferð með mest lítið, bara sem var drasl í búrinu. Fínt að nýta rigningardag í svona =) Maður er bara orðinn spenntur fyrir að komast í "nýtt".

Sunnudagurinn 11. júlí
Fjölskyldu- og húsdýragarðurinn var nýttur í góðviðrinu. Veðrið var hrikalega gott. Sofnaði hjá skipinu í hitanum. Afskaplega notalegt og magnað hvað þessi börn eru orðin stór og sjálfbjarga að dunda sér. Bjartur hitti Andrew vin sinn og þeir voru á fullu að leika.

Mánudagurinn 12. júlí
Íbúðastúss gegnum síma og email...alveg orðinn leiður á þessu ;)
Bína fór í klippingu og mæðraskoðun þannig að við fórum á leikskólaleikvöllinn og í búð, svo heim að borða. Þegar allir voru búnir að borða var klukkan hálf 1 og Dagný sofnaði við matarborðið =)
Skelltum okkur í Hellisgerði. Reyndar dró ský fyrir sólu þegar við mættum þangað og varð svoldið svalt, en eftir 10m var allt orðið heiðskýrt og bongóblíða tók við. Lágum þar og sleiktum sólina fram eftir degi.

Þriðjudagurinn 13. júlí
Morgunkaffi á Völlunum. Hangið heima í rigningunni, krakkarnir fóru út að leika.

Miðvikudagurinn 14. júlí
Enn verið að stússast í fasteignamálum. Merkilegt mikið af pappír og fleira sem þarf að flytja milli landshluta. Fórum í Fjölskyldu- og Húsdýragarðinn í boði Atlantsolíu. Alltaf gaman þar.

Fimmtudagurinn 15. júlí
Sleiktum sólina út í garði. Skrapp með stelpunum í fjöru/strandferð.

Föstudagurinn 16. júlí
Enn heldur blíðan áfram. Fer að verða svoldið þreytandi...nei, mætti bara koma einn rigningardagur á milli, svona fyrir blómin og tiltekt ;)
D var heit í nótt og var haldið inni í dag. Lék samt á alls oddi eins og vanalega, ótrúlegt hvað þessi stelpa er skemmtileg, hún er bara eitt stórt bíó.
Fór með eldri krakkana í sund í Álftaneslaug. Heilmikið stuð í öldulauginni og rennibrautin er nú ekki leiðinleg. S vildi ekki fara með í fyrstu ferð þannig að við strákarnir vorum einir. Þegar ég kom niður vissi ég ekki hvað sneri upp og niður og var góðan tíma að ná áttum í litlu lauginni sem tekur við eftir rennibrautina. Síðan samþykkti S að koma með og voru þær ferðir mun hægari en alveg jafn skemmtilegar =)
Skruppum í Bónus á Völlunum (því þar fær maður enn kassana utan af börnunum sem eru langt bestir því þeir þola svo mikið) og fengum svo B&B í old school pizzu um kvöldið.

Laugardagurinn 17. júlí
DSL Skutluðum Degi og Sól að sækja bílinn sinn inní HF og D sofnaði, var að spjalla við Sunnu um að það væru bara 2 vakandi þegar heyrist í D "Ég er vöknuð".
Nauthólsvík með Degi og Ingu og Sól. Rjómablóða allan daginn, létum okkur svo hverfa þegar að góð ský mættu á svæðið en þau hurfu nú fljótt og sólin baðaði bæinn áfram.
Þau komu svo í kjúlla um kvöldið.

Sunnudagurinn 18. júlí
Blíðan heldur áfram. Garðurinn var bara tekinn á blíðviðrið í dag. Það var ekki ský að sjá í allan dag og hitinn vel yfir 20° allan daginn. Tókum fram gúmmíbátinn og fylltum af vatni og fleira til að blása upp var leikið með út í garði.

Mánudagurinn 19. júlí
Næstum alveg jafn gott veður og í gær. Kíktum aftur í Naut. og mundum eftir gúmmíbátnum í þetta skiptið. Það var rosalega gaman að kíkja með krakkana út á bát. Fyrst var Sunna ein með mér og Dagný bættist svo við og fannst þetta alveg viðurstyggilega fyndið. Við feðgar fórum svo í góða ferð út fyrir víkina. Ætluðum að kíkja á pramma en brjálaður hettumávur var með unga á honum og hleypti okkur ekki uppá hann. B kíkti uppá stóra prammann og síðan dóluðum við um og fylgdumst með hettumávunum stinga sér og veiða síli handa unganum. Afskaplega notalegt og fullt af fólki á ströndinni.

Þriðjudagurinn 20. júlí
MU með Monsa og co. Keypti árskort, á ábyggilega eftir að nýta það í vetur líka með krakkaskarann, þannig að það er um að gera að prófa þetta og þeim finnst miklu meira gaman að geta farið aftur og aftur í tækin, sérstaklega þegar það er ekki stappað í garðinum að geta hoppað milli tækja án þess að þurfa að bíða í röð.
Ætluðum svo á Fabrikkuna en fórum bara á Eldsmiðjuna.

Miðvikudagurinn 21. júlí
Fínasta veður, sól og blíða þannig að það var tekin Nauthólsvíkin með Monsa og co. Vorum mætt fyrir hádegi og entumst reyndar ekki nema í nokkra tíma. Hallur afi heilsaði uppá okkur, hann kom auga á mig við grillið þegar hann var að horfa yfir víkina. Síðan var bara tekið sjósund með Monsa og var að leika við krakkana í víkinni.

Fimmtudagurinn 22. júlí
Skrifuðum undir fasteignakaup. Loksins er sá áfangi frá og fáum við í síðasta lagi afhent fyrsta laugardag í Ágúst en vonandi fyrr. Um kvöldið vorum við að tala við Helgömmu í tövunni þegar að Dagný hoppar yfir alla í sófanum. Hún er svo mikill villingur, enda var hún hálf drusluleg (sem og aðrir) eftir þetta hopp.

Föstudagurinn 23. júí
Ætluðum í sund en snerist í hellidembu og rok þannig að það var bara hangið heima. Þrifið og elduð skúffukaka, svo komu Monsi og co í heimsókn í pizzu og sá sem er að taka íbúðina okkar uppí kom að skoða hana, svona til að staðfesta að hún væri í samræmi við myndirnar. Hann átti von á að þau myndu afhenda sína innan nokkurra daga þannig að við flytjum vonandi fyrr en seinna ;) Fyllti nokkra kassa af drasli, er að verða búinn að fylla geymsluna =)

Laugardagurinn 24. júlí
Álftanessundlaugin með Monsa og co. Inception um kvöldið, vorum í vandræðum með pössun þegar að Dagur og co komu til bjargar og pössuðu farm á nótt (því myndir var í lengra lagi).

Sunnudagurinn 25. júlí
Pakkaði í nokkra kassa. Hálf lítið sofinn þ.s. D vaknar allaf á "réttum" tíma. Smá göngutúr og pizza um kvöldið og svo sjónvarpsgláp. Bjartur fór með Binna í stólnum sem hann fékk í gær með Degi & Ingu. Hann var búinn að vera mjög spenntur að fá stólinn til að geta tekið Binna með á hjólinu, enda er hann afskaplega góður við Binna sinn og hugsar vel um hann.

Mánudagurinn 26. júlí
Dagný fór með Svölu í göngutúr, kaka var elduð og ég fór með Sunnu í búðir (kassaleiðangur).

Þriðjudagurinn 27. júlí
Pakk, pakk, pakk...
Ég og Bjartur fórum í Sundhöll Reykjavíkur. Ekki málið f. hann að hoppa af stóra stökkbrettinu og gerði það nokkrum sinnum og fannst það bara gaman. Hvorki nýlegasta né hreinlegasta sundlaugin en skemmtilegt að fara á stökkbretti og kafa djúpt.

Miðvikudagurinn 28. júlí
Aftur komin bongó blíða, krakkarnir út að leika og ég tók til og var að pakka. Fengum geymsluna á Hjallabraut 35, gott að ná að byrja að flytja. RL plastkassarnir eru snilld, þótt ég eigi nú meira en 50 þá finnst mér vanta nokkra í viðbót...kannski ég tæmi nú bara nokkra í staðin.

Fimmtudagurinn 29. júlí
Flutningar, geymslan er að verða tóm. Fengum rosalega góða súpu hjá Bekku&Bödda um kvöldið.
Verður snilld næst þegar maður flytur að eiga stóra krakka sem hjálpa til, og sjá sjálf um sitt dót =)

Föstudagurinn 30. júlí
Fengum afhent, byrjað að sparsla og gera tilbúið f. málningu.

Laugardagurinn 31. júlí
Málað í allan dag (og þó ekki allt klárað). Böddi reddaði alveg að það náðist að mála svona mikið. Ég rétt náði að fara á undan honum og líma meðfram og leggja á gólfin. Um kvöldið kláraði ég svo að mála þannig að hægt væri að flytja.

Sunnudagurinn 1. ágúst
Flutningar í fínu veðri. Dagur, Inga & Sól og Gauti & Svava hjálpuðu til. Algjör snilld að fá þá bræður og fjölskyldur og frábært að Dagur kom með kerru og einnig var troðið í bílinn hjá Gauta. Var líka með sendibílinn frá Bödda þannig að þetta voru nokkrar ferðir sem við bræður tókum, enda var það allt í góðu þ.s. það var stutt að fara. Tókst að flytja allt á 6 tímum og svo pizza á nýjum stað um kvöldið.
Fyrsta nóttin í nýrri íbúð var bara afskaplega notaleg, gott að ná að klára þetta allt á 3 dögum.

Mánudagurinn 2. ágúst
Tiltekt á Hjallabraut 23. Þegar ég var svo að taka niður ljósaseríurnar endaði ég á að slá út rafmagninu og öryggin voru búin...hef ætlað að kaupa ný til að eiga niðri, fínt að gera það núna áður en ég fer.

Þriðjudagurinn 3. ágúst
Fríið búið og byrjaði aftur að vinna í dag. Keypti öryggi og skilaði Hjallabraut 23 til nýrra eigenda um kvöldið.

Myndir úr sumarfrínu 2010

Harpan

2010-07-09T18:05:00.002Z

Keyrði framhjá Hörpunni í dag og "þetta" leit út fyrir að vera krumpaður pakki sem væri við það að hrynja...skulum vona að endanlega útkoman verði betri ;)

Trampólín

2010-06-30T22:39:00.002Z

Var að bera búslóðina með Degi bróður um daginn ásamt góðu fólki og þegar allt var að verða komið var trampólínið eftir. Það varð úr að ég fengi það lánað og var því láni tekið afskaplega vel á heimilinu. Trampólínið var komið upp um kvöldið og strax byrjað að hoppa. Síðan var reynt að kíkja á það færi gafst næstu daga. Krakkarnir í blokkinni hafa ekki látið sig vanta og augljóst að sumir hafa ekkert annað að gera en að hoppa allan daginn ;) Stundum þurfti nú að segja þeim að hætta þessu þegar klukkan var orðin full margt að mati gamla mannsins og þegar verðandi unglingar voru mættir á svæðið með tilheyrandi látum var því umsvifalaust lokað. Í dag pakkaði ég því saman þ.s. útlit er fyrir rigningu næstu daga. Undrandi ungmenni hafa sést í garðinum seinnipartinn. Hafa þau horft vonleysislega á staðinn þar sem trampólínið var og ráfað um í von að þetta sé bara martröð og að þau vakni fljótlega og trampólínið sé á sínum stað. Sumir hafa meira að segja gert sér ferð hingað upp og spurt hvað hafi orðið um það =)
Annars þætti mér nú gaman að vita hvort ekki sé til eitthvað alíslenskt og kjánalegt orð yfir "trampólin"?

Sumarhátíð Víðivalla

2010-06-22T22:31:00.000Z

Frábært veður og sumarhátíðin var með eindæmum góð í alla staði í ár. Það er frábært fólk í þessu ráði og þessi leikskóli er alveg yndislegur. Ekkert nema gott um daginn að segja, allir saddir og sælir og enginn að væla þótt að Pollapönk hefði sungið nokkrum sinnum Vælubílinn =)

Hér má sjá systurnar og glittir í gamla á bakvið á grillinu ;)

Lán í óláni

2010-06-22T22:07:00.003Z

Var með mánaðargamla tölvu meðferðis í dag þ.s. ég þurfti að fara með hana í tékk því það var galli í skjánum sem var að há mér. Þeir áttu nú ekki jafn auðvelt með að sjá hvað ég var að tala um þegar ég mætti með hana í búðina þannig að ég var bara settur á biðlista uppá að koma tölvunni í skoðun. Þegar ég fór svo aftur til vinnu lagði ég í gjaldskylt bílastæði rétt hjá Landakoti en gleymdi tölvunni þ.s. hún var í svörtum bakpoka og á gólfinu farþegamegin.
Þegar ég kem svo aftur í bílinn eftir vinnu er hliðarglugginn brotinn og taskan horfin. Augljóslega vera nógu mikill friður þarna til að athafna sig. Við tók að hringja í lögguna, tryggingar og reyna að redda viðgerð.

Daginn eftir var bíllinn sem nýr og kostaði nú minna en ég átti von á. Tryggingar borguðu tölvuna, þannig að ég hafði bara mist töskuna og aðra tölvuhluti sem voru í töskunni en enginn stórskaði af þeim missi. Þegar ég var að fara að panta nýja tölvu rak ég augu alveg eins notaða vél á netinu sem hafði verið sett til sölu daginn áður en minni var stolið. Sá var staðsettur í Hafnarfirði og borgaði ég uppsett verð hjá honum þannig að tryggingarnar dugðu. Tókst einnig að endurheimta flestar ljósmyndir af minniskortunum í myndavélunum með einhverjum galdratólum sem geta sótt eyddar myndir aftur. Þannig að ég tapaði ekki nema smá vinnu og tiltekt í tölvunni, en losnaði við gallaða skjáinn ;)

Pókerklúbburinn Bjólfur

2010-06-11T11:39:00.005Z

Lokakvöldið í fyrsta pókermóti Bjólfs var í kvöld. Ég hafði nú reyndar ætlað mér í ferð með góðu fólki fyrr um daginn og fram á kvöld, en þ.s. ekki tókst að redda pössun var ég upptekinn þegar sú ferð hófst. Áhuginn á að mæta var alveg til staðar þrátt fyrir að það væri nokkuð fyrirséð að Bósi myndi hirða lokapot mótaraðarinnar, þá var samt hægt að spila uppá pott kvöldsins. 2 aukamenn mættu og byrjað var að spila og þegar að búið var að loka fyrir re-buy þá datt forystumaðurinn út þannig að opið var fyrir 3 að slá hann út auk þess sem ég gat jafnað hann. Með þokkalegri spilamennsku og örlítilli heppni tókst mér að vinna kvöldið og náði því potti kvöldsins sem og hálfum lokapottinum. Skemmtilegt að ná að komast upp þrátt fyrir að hafa misst af fyrsta kvöldinu og var því bara á 3 kvöldum af 4. En það er alltaf gaman að taka póker og ekki verra ef maður vinnur ;)

Fjölskyldudagur í Selvík

2010-06-06T11:26:00.002Z

Fjölskyldudagur í Selvík var í dag hjá starfsmannafélaginu. Það eru komin þónokkur ár síðan ég fór í Selvík með Halli&Sæunni og var það algjör paradís fyrir mig og Hall bróður að geta hlaupið um svæðið og ekki síst að geta farið út á bátana. Í minningunni var reyndar eyjan rétt fyrir utan brygguna þ.s. ég man að við gerðum okkur ferðir þangað til að skoða hana. Þegar ég sá nú hvað hún var langt í burtu brá mér heldur, ég hafði einhvernveginn frekar átt von á að hún yðri enn nær, en hún virkaði reyndar enn minni þ.s. hún var svo óskaplega langt í burtu. Þannig að þetta hefur verið ágætis ferðalag á sínum tíma hjá okkur bræðrum. Það verður gaman að geta einhverntíman verði þarna að sumri til með krakkana...en maður verður víst að eiga nóg af punktum til að fá sumarútlutunun, þannig að háannatíminn verður bara að bíða betri tíma.
En dagurinn var afskaplega góður, nóg var að borða, skemmtiatriði, hoppukastali o.fl. Minigolfið átti nú mestan áhuga hjá þeim stærri en Dagný vildi bara vaða og varð alveg hundfúl ef hún var tekin uppúr fjörborðinu. Veðrið var svo gott að við vorum orðin uppgefin eftir nokkra tíma og heldum aftur heim, södd og sæl eftir góðan dag.

Faust

2010-05-29T18:00:00.001Z

Þessi leiksýning var alveg við mitt hæfi. Drungalegir tónar, loftfimleikar, djöflar og púkar í bland við leit að hamingju. Hilmir Snær fannst mér sérstaklega koma að óvart og ég er ekki viss um að ég hefði þekkt hann ef ég hefði ekki vitað að hann væri í sýningunni. Verð að mæla með þessari sýningu...það eina sem vantaði að hún væri lengri ;)

Krakkarnir fengu að kíkja til Möllu&Þrastar á meðan og voru hæstánægð með að fá að fara í pottinn hjá þeim. Enda rjómablíða og svo endaði dagurinn með grillveislu og Eurovision á Sævanginum.

Fyrsta útskriftin

2010-05-27T23:59:00.002Z

Bjartur útskrifaðist í dag af leikskólanum. Salurinn var fullur af stoltum foreldrum þegar Álfarnir (elstu bekkingar) héldu tónleika þ.s. þau sungu hvert lagið á fætur öðru við fögnuð áhorfenda. Síðan fengu þau útskriftarplagg og þegar allir voru byrjaði að gæða sér að kræsingum fékk hver og einn möppu með myndum, teikningum og fleiru sem þau hafa gert síðan þau byrjuðu á Víðivöllum.
Afskaplega ánægjuleg stund og gott að vita hvað vel er haldið utan um börnin á leikskólanum.
Nú er það bara sumarfrí í júlí og svo byrjar stóri strákurinn í grunnskóla í ágúst...magnað hvað manni finnst stutt síðan hann mætti á svæðið =)

Kveð fyrirmyndar fólk

2010-05-27T23:02:00.000Z

Í dag fór ég í síðbúið kveðjukaffi í fyrirmyndar stofnum sem ég hef alið manninn síðasta hálfa fimmta árið, frá árbyrjun 2006, en sagði skilið við þann góða stað síðustu mánaðarmót. Það er alltaf erfitt að segja skilið við góðan stað og gott fólk og að einhverju leiti skilur maður alltaf eftir hluta af sjálfum sér. Þessi fjögur ár voru ákaflega góð og þykir mér afskaplega vænt um alla sem ég kynntist þar enda stóðum við okkur mjög vel og þau munu halda áfram að gera það án mín =) Góð orð féllu í minn garð í dag og get ég ekki annað en þakkað kærlega fyrir falleg blóm sem nú prýða stofuna, Takk kæra starfsfólk Umferðarstofu fyrir mig =)

Ástæða þess að ég skipti um vinnu er að um áramótin ákvað ég að það væri kominn tíma til að ögra sjálfum mér og gera eitthvað "nýtt". Þó ég muni nú seint segja skilið við tölvurnar þá ákvað ég að brydda uppá einhverju öðruvísi á ferilskránni og víkka sjóndeildarhringinn. Eftir stutta leit náðust samningar við Landsbankann sem ég gekk til liðs við fyrir tæpum mánuði.
Nóg er að gera það að komast inní margt sem ég hef aldrei séð áður, þannig að ég er enn meira upptekinn en áður. Mér líst vel á teymið sem ég er í, þar eru menn mikið fyrir að hreyfa sig sem mér fellur ákaflega vel. Þannig að ég er á fullu að kynnast nýju fólki, nýrri menningu, nýjum aðferðum...og líst bara vel á =)

Leikhúsfólk

2010-05-02T19:38:00.001Z

Krakkarnir fengu að fara baksviðs í leikhúsið hjá Halli afa fyrir síðustu sýninguna á Oliver. Bjartur var búinn að Hall til að sýna sér sviðsmyndina þ.s. hann hafði svo gaman af síðust heimsókn í leikhúsið. Við fengum að sitja út í sal og fylgjast með söngupphitun hjá krökkunum og höfðu allir gaman af. Bjartur hafði farið með okkur áður að sjá sýninguna og hafði mestan áhuga á leikmyndinni og öllu sem finna mátti baksviðs. Stelpurnar sátu saman og voru bara augun að horfa á alla krakkana dansa og syngja.
Tvemur morgnum seinna voru þær enn syngjandi saman Ólíver, Ólíver. Spurning hvort þær verði einhverntíman syngjandi á sviði...undir stjórn stóra bróðurs ;)